(એજન્સી)વડોદરા, ગુજરાતમાં ડિજિટલ એરેસ્ટના વધતા કિસ્સાઓ વચ્ચે વડોદરામાં એક બેંક મેનેજરની સમયસૂચકતાને કારણે એક નિવૃત્ત સિનિયર સિટિઝન લાખો રૂપિયાની છેતરપિંડીનો ભોગ બનતા બચી ગયા છે.
મુંબઈ ક્રાઈમ બ્રાંચના નકલી અધિકારી બનીને ઠગ ટોળકીએ વૃદ્ધને સતત પાંચ દિવસ સુધી ‘ડિજિટલ એરેસ્ટ’ રાખી રૂ. ૨૦ લાખ પડાવવાનો પેંતરો રચ્યો હતો, જે બેંક મેનેજરની સતર્કતાને કારણે નિષ્ફળ રહ્યો છે.
પ્રાપ્ત માહિતી અનુસાર, ભોગ બનનાર સિનિયર સિટિઝનને પાંચ દિવસ પહેલા મુંબઈ ક્રાઈમ બ્રાંચના નામે એક ફોન કોલ આવ્યો હતો. સામે પક્ષે બોલનાર શખ્સે ધમકાવતા કહ્યું હતું કે, તમારા નામે લેવાયેલું સીમકાર્ડ અને બેંક એકાઉન્ટ મોટા આર્થિક કૌભાંડમાં વપરાયું છે.
ધરપકડનો ડર બતાવી ઠગબાજોએ વૃદ્ધને વીડિયો કોલ દ્વારા સતત નજર હેઠળ રાખ્યા હતા અને કોઈને પણ જાણ ન કરવા તાકીદ કરી હતી. આ રીતે તેમને પાંચ દિવસ સુધી ઘરની અંદર જ ‘ડિજિટલ એરેસ્ટ’ કરી રાખવામાં આવ્યા હતા.
ઠગ ટોળકીએ કેસમાંથી બહાર કાઢવાના બહાને વૃદ્ધ પાસે ?૨૦ લાખની માગણી કરી હતી. ગભરાયેલા સિનિયર સિટિઝન પોતાની ફિક્સ ડિપોઝિટ તોડાવીને આ રકમ ટ્રાન્સફર કરવા માટે બેંકમાં પહોંચ્યા હતા. જોકે, બેંકમાં વૃદ્ધનો ફફડાટ અને ઉતાવળ જોઈને બેંક મેનેજરને તાત્કાલિક શંકા ગઈ હતી.
બેંક મેનેજરે ટ્રાન્ઝેક્શન કરતા પહેલા વૃદ્ધને વિશ્વાસમાં લઈને પૂછપરછ કરી હતી. પ્રાથમિક વાતચીતમાં જ મેનેજર સમજી ગયા હતા કે આ ‘ડિજિટલ એરેસ્ટ’નો ક્લાસિક કેસ છે. તેમણે તુરંત ટ્રાન્ઝેક્શન અટકાવી દીધું અને સ્થાનિક પોલીસને જાણ કરી હતી.
પોલીસની ટીમ પણ તાત્કાલિક બેંક પહોંચી હતી અને વૃદ્ધને શાંત પાડી સમગ્ર મામલો સમજાવ્યો હતો. આખરે પોતાની મહેનતની કમાણી બચી જતાં સિનિયર સિટિઝને બેંક મેનેજર અને પોલીસનો આભાર માન્યો હતો.
