અમેરિકા અને ઈરાન વચ્ચે ચાલી રહેલ તણાવ સતત વધી રહ્યો છે. આ દરમિયાન અમેરિકી સેનાએ સીરિયામાં એક મહત્વપૂર્ણ સૈન્ય મથક પરથી પોતાના સૈનિકોને હટાવવાનું શરૂ કરી દીધું છે. સેનાના આ પગલાને સીરિયામાં અમેરિકન સૈનિકોની હાજરી ઘટાડવાના અભિયાનનો એક ભાગ માનવામાં આવે છે. ઇરાકી અને સીરિયન અધિકારીઓના જણાવ્યા અનુસાર, યુએસ સેનાએ કાસ્ટ્રક ક્ષેત્રમાં તેના બેઝ પરથી સૈનિકો અને લશ્કરી ઉપકરણોને હટાવવાનું શરૂ કરી દીધું છે.
એપીના અહેવાલ મુજબ અમેરિકન સેના સતત પોતાના સાધનો સાથે ઈરાકની સરહદ તરફ આગળ વધી રહી છે. જો કે, જ્યારે આ અંગે અમેરિકન આર્મીના સેન્ટ્રલ કમાન્ડ પાસેથી જવાબ માંગવામાં આવ્યો તો તેઓએ જવાબ આપવાનો ઈન્કાર કરી દીધો. બીજી તરફ કાસ્ત્રક બેઝની આસપાસના વિસ્તાર પર નિયંત્રણ રાખતા કુર્દિશ સીરિયન ડેમોક્રેટિક ફોર્સે પણ કોઈ પ્રતિક્રિયા આપી નથી.
એક વરિષ્ઠ અમેરિકી સુરક્ષા અધિકારીએ નામ જાહેર ન કરવાની શરતે જણાવ્યું કે, બેઝને ખાલી કરાવવાનું કામ રવિવારથી શરૂ થયું અને સોમવારે ત્યાંથી આવતા અમેરિકી સૈનિકો અને સૈન્ય સાધનો ઈરાકના ઉત્તરી અર્ધ-સ્વાયત્ત કુર્દિશ ક્ષેત્રમાં પ્રવેશ્યા. સીરિયન સુરક્ષા અધિકારીએ જણાવ્યું હતું કે સોમવાર સુધીમાં લગભગ 200 સૈનિકો બેઝ પર હાજર હતા અને લશ્કરી જામિંગ સિસ્ટમ્સ, એર ડિફેન્સ સિસ્ટમ્સ અને એન્જિનિયરિંગ વિભાગોને દૂર કરવાનું કામ ચાલી રહ્યું હતું.
તમને જણાવી દઈએ કે, આ મહિનાની શરૂઆતમાં અમેરિકી સેનાના સેન્ટ્રલ કમાન્ડ સેન્ટર અને સીરિયન રક્ષા મંત્રાલયે સંયુક્ત જાહેરાતમાં અમેરિકન સૈનિકોની સંખ્યા ઘટાડવાનો ઉલ્લેખ કર્યો હતો. તેણે કહ્યું હતું કે અમેરિકન સૈનિકોએ જોર્ડન બોર્ડર પાસે સ્થિત બેઝ પણ ખાલી કરી દીધા છે. આ સિવાય અમેરિકી સેનાએ તેના અડ્ડાઓના અટકાયત કેન્દ્રોમાં રખાયેલા લગભગ 5,700 કેદીઓને પણ ઈરાકની જેલોમાં મોકલ્યા છે, જ્યાં તેમના પર કેસ ચલાવવામાં આવશે.
