કેનેડા સરકારે 26/11 મુંબઈ આતંકી હુમલાના માસ્ટરમાઇન્ડ તહવ્વુર હુસૈન રાણાની કેનેડિયન નાગરિકતા રદ કરવા માટે સત્તાવાર કાર્યવાહી શરૂ કરી છે. કેનેડાના વડા પ્રધાન માર્ક કાર્નેની 26 ફેબ્રુઆરીએ ભારતની મુલાકાત પહેલાં લેવાયેલું આ પગલું ખૂબ જ મહત્વપૂર્ણ માનવામાં આવે છે. ભૂતપૂર્વ પીએમ જસ્ટિન ટ્રુડોના કાર્યકાળ દરમિયાન બગડેલા ભારત-કેનેડા સંબંધોને સુધારવા અને નવી દિલ્હી સાથેના સંબંધો પુનઃસ્થાપિત કરવાના ઓટાવાના પ્રયાસ તરીકે આને જોવામાં આવી રહ્યું છે.
રાણાની વર્તમાન સ્થિતિ અને ભારતમાં પ્રત્યાર્પણ
પાકિસ્તાનમાં જન્મેલા 65 વર્ષીય તહવ્વુર હુસૈન રાણા હાલમાં ભારતીય કસ્ટડીમાં છે. તે પાકિસ્તાન સ્થિત આતંકવાદી સંગઠન લશ્કર-એ-તૈયબા દ્વારા કરવામાં આવેલા 26/11ના મુંબઈ આતંકવાદી હુમલા સાથે સંબંધિત આરોપોમાં ટ્રાયલનો સામનો કરી રહ્યો છે. આ ભયાનક હુમલામાં 160થી વધુ લોકોએ જીવ ગુમાવ્યા હતા.
10 એપ્રિલના રોજ, રાણાના અમેરિકાથી પ્રત્યાર્પણ પછી રાષ્ટ્રીય તપાસ એજન્સી (NIA) દ્વારા ઔપચારિક રીતે ધરપકડ કરવામાં આવી હતી. સિનિયર નેશનલ સિક્યુરિટી ગાર્ડ (NSG) અને NIA અધિકારીઓની એક ટીમ તેને અમેરિકાના લોસ એન્જલસથી વિશેષ વિમાન દ્વારા નવી દિલ્હી લાવી હતી.
નાગરિકતા રદ થવાનું વાસ્તવિક કારણ: આતંકવાદ નહીં, પરંતુ છેતરપિંડી
કેનેડાની સરકારનું તેની નાગરિકતા રદ કરવાનું પગલું આતંકવાદના આરોપો પર આધારિત નથી. ડિપાર્ટમેન્ટ ઓફ ઈમિગ્રેશન, રેફ્યુજીસ એન્ડ સિટીઝનશિપ કેનેડા (IRCC) એ તેની નોટિસમાં સ્પષ્ટતા કરી છે કે રાણાને ‘ખોટી રજૂઆત’ના આધારે નાગરિકતા આપવામાં આવી હતી.
રાણા 1997માં કેનેડા ગયા હતા. વિભાગનો આરોપ છે કે 2000માં નાગરિકતા માટે અરજી કરતી વખતે રાણાએ કેનેડામાં પોતાના રહેઠાણ વિશે ખોટી માહિતી આપી હતી, જેના આધારે તેને 2001માં નાગરિકતા મળી હતી.
