અમદાવાદ , રામોલ વિસ્તારમાં આવેલા કેસર હાઈટ્સ શોપિંગ સેન્ટરમાં સ્થિત ડેકોરેશનની દુકાનમાં તોડફોડની ઘટના નોંધાઈ હતી. દુકાનના વેપારીએ સંકેત ચૌધરી નામના યુવક વિરુદ્ધ રામોલ પોલીસ સ્ટેશનમાં ફરિયાદ નોંધાવી હતી.
ફરિયાદ મુજબ, યુવક દુકાનમાં ઘૂસી આવ્યો હતો અને દુકાનના માલિક વિશે પૂછપરછ કરતા ધમકીભર્યા શબ્દો ઉચ્ચાર્યા હતા. ત્યારબાદ તેણે હાથમાં રહેલી બેઝબોલ સ્ટિકથી દુકાનના દરવાજાના કાચ પર ફટકા મારીને કાચ તોડી નાખ્યો હતો. આ ઉપરાંત દુકાનમાં રહેલી અન્ય ચીજવસ્તુઓમાં પણ નુકસાન પહોંચાડ્યું હતું. ઘટનાના સમયે દુકાનમાં હાજર કર્મચારી ગભરાઈ ગયો હતો. બાદમાં કર્મચારીએ દુકાનમાલિકને જાણ કરી અને પોલીસમાં ફરિયાદ નોંધાવી હતી.
આરોપી અગાઉ પણ વસ્ત્રાલ વિસ્તારમાં જાહેર માર્ગ પર ઊભેલા વાહનોમાં તોડફોડ કરવાના બનાવમાં સંડોવાયેલો હોવાનો ઉલ્લેખ સ્થાનિક સ્તરે થાય છે. હાલની ઘટનામાં આરોપી કેસર હાઈટ્સ વિસ્તારમાં આવી દુકાનમાં તોડફોડ કરી જતા વેપારીઓમાં ભયનો માહોલ ફેલાયો હતો. ઘટનાસ્થળના સીસીટીવી ફૂટેજ પોલીસને મળ્યા છે.
ફરિયાદના આધારે રામોલ પોલીસે યુવક વિરુદ્ધ ગુનો નોંધ્યો છે. યુવક જે વાહન લઈને આવ્યો હતો, તેના નંબરના આધારે તપાસ શરૂ કરવામાં આવી છે. આરોપીને ઝડપી લેવા માટે શોધખોળ અને કાનૂની કાર્યવાહી ચાલુ છે.SS1MS
