સુરત પાસપોર્ટ ઓફિસને બોમ્બની ધમકી બાદ ગુજરાતના અનેક શહેરો હાઈ-એલર્ટ પર, નવસારી સહિતની પોસ્ટ ઓફિસોમાં સર્ચ ઓપરેશન
નવસારી, ૨૮ ફેબ્રુઆરી: ગુજરાતમાં ફરી એકવાર અસામાજિક તત્વો દ્વારા ઈમેલ મારફતે બોમ્બની ધમકી આપીને ભયનો માહોલ ઉભો કરવાનો પ્રયાસ કરવામાં આવ્યો છે. સુરત પાસપોર્ટ ઓફિસને બોમ્બથી ઉડાવી દેવાની ધમકી મળ્યા બાદ તુરંત જ રાજ્યના અન્ય મહત્વના શહેરોની પોસ્ટ ઓફિસો અને સરકારી ઇમારતોને પણ નિશાન બનાવવામાં આવશે તેવા ઈમેલ મળતા સમગ્ર પોલીસ તંત્ર દોડતું થયું છે. નવસારી, ભાવનગર, જૂનાગઢ અને જામનગર સહિતના ૧૪થી વધુ શહેરોમાં સુરક્ષા વ્યવસ્થા સઘન બનાવી દેવામાં આવી છે.
નવસારીની નાગ તલાવડી વિસ્તારમાં આવેલી હેડ પોસ્ટ ઓફિસને બોમ્બથી ઉડાવી દેવાની ધમકી મળતા જ જિલ્લા પોલીસ વડા સહિતનો ઉચ્ચ અધિકારીઓનો કાફલો ઘટનાસ્થળે પહોંચી ગયો હતો. નવસારી ટાઉન પોલીસ, વિજલપોર પોલીસ તેમજ LCB અને SOGની ટીમોએ પોસ્ટ ઓફિસને કોર્ડન કરી લીધી હતી. બોમ્બ ડિસ્પોઝલ સ્ક્વોડ (BDDS) અને ડોગ સ્ક્વોડ દ્વારા પોસ્ટ ઓફિસના ખૂણેખૂણાની તપાસ કરવામાં આવી હતી.
સાવચેતીના ભાગરૂપે સાંઢકુવાથી વિજલપોર તરફ જતો મુખ્ય માર્ગ અવરજવર માટે તાત્કાલિક અસરથી બંધ કરી દેવામાં આવ્યો હતો. કોઈપણ અનિચ્છનીય ઘટનાને પહોંચી વળવા માટે ફાયર બ્રિગેડની ટીમો અને ૧૦૮ એમ્બ્યુલન્સને પણ સ્ટેન્ડબાય રાખવામાં આવી હતી.
પ્રાપ્ત વિગતો મુજબ, માત્ર નવસારી જ નહીં પરંતુ ગુજરાતના વિવિધ જિલ્લાઓમાં આવેલી પોસ્ટ ઓફિસોને ટાર્ગેટ કરવાની ધમકી આપવામાં આવી છે. જેમાં મુખ્યત્વે નીચેના શહેરોની હેડ પોસ્ટ ઓફિસનો સમાવેશ થાય છે:
ઉલ્લેખનીય છે કે, છેલ્લા કેટલાક સમયથી શાળાઓ, એરપોર્ટ અને હવે સરકારી કચેરીઓને બોમ્બથી ઉડાવી દેવાના ફેક ઈમેલ આવવાનો સિલસિલો વધ્યો છે. અગાઉની તપાસમાં આ ધમકીઓ માત્ર અફવા સાબિત થઈ હતી, પરંતુ પોલીસ તંત્ર કોઈ પણ પ્રકારનું જોખમ લેવા માંગતું નથી. હાલમાં સાયબર ક્રાઈમની ટીમ આ ઈમેલ ક્યાંથી જનરેટ થયો છે અને તેની પાછળ કોનો હાથ છે તે દિશામાં ઝીણવટભરી તપાસ ચલાવી રહી છે.
