મધ્ય પૂર્વમાં સર્વત્ર યુદ્ધની આગ ફેલાઈ રહી હોય તેવું લાગે છે. અમેરિકન અને ઈઝરાયેલના હુમલા બાદ ઈરાને ખાડી દેશોમાં અમેરિકન સૈન્ય મથકોને નિશાન બનાવ્યા છે, જેનાથી યુદ્ધનું સ્તર વધુ વધી શકે છે. આ દરમિયાન ઈરાને મોટો દાવો કર્યો છે. સોમવારે ઈરાને દાવો કર્યો હતો કે યુએસ એરફોર્સનું F-15 ફાઈટર પ્લેન કુવૈતમાં ક્રેશ થયું છે. ઈરાની મીડિયા અનુસાર, તે ઈરાની હુમલાનો ભોગ બન્યો હોવાના અહેવાલ છે.
આને લગતા ઘણા વીડિયો સોશિયલ મીડિયા પર વાયરલ થઈ રહ્યા છે. ઈરાની પ્રેસ ટીવીએ પણ આ વીડિયો શેર કર્યો છે જેમાં એક ફાઈટર જેટ આકાશમાંથી પડતું જોવા મળી રહ્યું છે, જે આગમાં લપેટાઈ રહ્યું છે. એક અમેરિકન પાયલોટ પણ પ્લેન નીચે પડવાની ક્ષણો પહેલાં બહાર નીકળતો જોઈ શકાય છે. જોકે, અકસ્માતના કારણો કે પાઈલટની સ્થિતિ અંગે હજુ સુધી કોઈ સત્તાવાર નિવેદન જારી કરવામાં આવ્યું નથી. એ પણ સ્પષ્ટ નથી કે તે સમયે પ્લેન યુદ્ધ મિશન પર હતું કે ટ્રેનિંગ ફ્લાઇટ પર. આ લખાય છે ત્યાં સુધી યુએસ અને કુવૈતના અધિકારીઓએ આ અંગે કોઈ ટિપ્પણી કરી નથી.
ઈરાનના હુમલા ચાલુ છે
આ ઘટના એવા સમયે સામે આવી છે જ્યારે ઈરાન પર અમેરિકન અને ઈઝરાયેલના હુમલા બાદ ઈરાને ઘણા અમેરિકન બેઝ, સહયોગી દેશો અને ખાડી દેશોના મોટા શહેરો પર ડ્રોન અને મિસાઈલ હુમલા શરૂ કર્યા છે. ઈરાનના જવાબી હુમલાની અસર ઘણા દેશો સુધી પહોંચી છે. કુવૈત, બહેરીન અને સંયુક્ત આરબ અમીરાત પર મિસાઇલો અને ડ્રોનને અટકાવવામાં આવ્યા હતા, જેના કારણે ઘણા સ્થળોએ એરસ્પેસ બંધ કરવામાં આવી હતી અને સૈન્ય અને નાગરિક બંને જાનહાનિના અહેવાલો હતા.
