નવી દિલ્હીઃ સંજુ સેમસને T20 વર્લ્ડ કપ 2026ની 5 ઇનિંગ્સમાં 80.25ની એવરેજથી 321 રન બનાવ્યા હતા. આ શાનદાર પ્રદર્શન માટે સેમસનને ‘પ્લેયર ઓફ ધ ટુર્નામેન્ટ’નો ખિતાબ આપવામાં આવ્યો હતો. આ સાથે સેમસન T20 વર્લ્ડ કપમાં આ એવોર્ડ જીતનાર ત્રીજો ભારતીય બની ગયો છે. આવો, જાણીએ આ એવોર્ડ જીતનાર તમામ ભારતીય ખેલાડીઓ વિશે.
વિરાટ કોહલી: આ અનુભવી બેટ્સમેને T20 વર્લ્ડ કપ 2014 અને 2016માં ‘પ્લેયર ઓફ ધ ટૂર્નામેન્ટ’નો ખિતાબ જીત્યો હતો. તે બે વખત આ એવોર્ડ જીતનાર એકમાત્ર ભારતીય છે.
કોહલી T20 વર્લ્ડ કપ 2014માં 106.33ની એવરેજથી 319 રન બનાવીને સૌથી વધુ રન બનાવનાર ખેલાડી હતો. આ દરમિયાન કોહલીના બેટમાંથી 10 છગ્ગા અને 24 ચોગ્ગા આવ્યા હતા. આ પછી વર્ષ 2016માં પણ કોહલીએ આ એવોર્ડ જીત્યો હતો.
વિરાટ કોહલીએ T20 વર્લ્ડ કપ 2016માં કુલ 5 મેચ રમી જેમાં તેણે 136.50ની એવરેજથી 273 રન બનાવ્યા. તે એડીશનમાં સૌથી વધુ રન બનાવનારની યાદીમાં તે બીજા ક્રમે હતો.
જસપ્રીત બુમરાહ: જસપ્રીત બુમરાહની શાનદાર બોલિંગથી ભારતે T20 વર્લ્ડ કપ 2024નો ખિતાબ જીત્યો હતો. તે એડિશનમાં બુમરાહે 8 મેચ રમીને કુલ 29.4 ઓવર ફેંકી હતી. આ દરમિયાન બુમરાહે 124 રનમાં 15 વિકેટ ઝડપી હતી. જો કે અર્શદીપ સિંહ તે આવૃત્તિમાં 17 વિકેટ સાથે સૌથી વધુ વિકેટ લેનારાઓની યાદીમાં બુમરાહ કરતાં એક સ્થાન ઉપર હતો, બુમરાહે ડેથ ઓવરોમાં તેના શાનદાર પ્રદર્શનથી ‘પ્લેયર ઓફ ધ સિરીઝ’નો ખિતાબ જીત્યો હતો.
