ભારતીય ટીમનો વિસ્ફોટક બેટ્સમેન અભિષેક શર્મા બુધવારે ન્યૂઝીલેન્ડ સામેની મેચ દરમિયાન સસ્તામાં પેવેલિયન પરત ફર્યો હતો. ન્યૂઝીલેન્ડે પ્રથમ બેટિંગ કરતા 20 ઓવરમાં 7 વિકેટ ગુમાવીને 215 રન બનાવ્યા હતા. જેના જવાબમાં રમવા આવેલી ભારતીય ટીમની શરૂઆત ખૂબ જ ખરાબ રહી હતી. ટીમે પહેલા જ બોલ પર ઓપનર અભિષેક શર્માની વિકેટ ગુમાવી દીધી હતી. મેટ હેનરીએ તેને આઉટ કર્યો. આ સાથે અભિષેક શર્માના નામે એક અનિચ્છનીય રેકોર્ડ નોંધાયો છે. અભિષેક શર્મા T20 ઈન્ટરનેશનલમાં પ્રથમ બોલ પર આઉટ થનારો પાંચમો ભારતીય બેટ્સમેન બની ગયો છે.
અભિષેક શર્મા ચોથી T20 મેચમાં પ્રથમ બોલ પર મોટો શોટ મારવાના પ્રયાસમાં આઉટ થયો હતો. તે પ્રથમ બોલ પર આઉટ થનારો પાંચમો ભારતીય બેટ્સમેન બની ગયો છે. આ પહેલા કેએલ રાહુલ (2016), પૃથ્વી શૉ (2021), રોહિત શર્મા (2022), સંજુ સેમસન (2026) અને અભિષેક શર્મા આ લિસ્ટમાં છે. અભિષેકના આઉટ થયા બાદ ભારતે નિયમિત અંતરે વિકેટો ગુમાવી હતી. પાવરપ્લેમાં ટીમ માત્ર 53 રન બનાવી શકી અને બે વિકેટ ગુમાવી દીધી.
અભિષેક શર્માના નામે એક શરમજનક રેકોર્ડ પણ જોડાયો હતો. અભિષેક શર્મા ભારત તરફથી રમતા ટી20 શ્રેણીમાં ઓપનર તરીકે બે વખત શૂન્ય પર આઉટ થનાર પ્રથમ બેટ્સમેન બની ગયો છે. આ પહેલા અભિષેક બીજી મેચમાં ખાતુ ખોલાવ્યા વગર જ પેવેલિયન પરત ફર્યો હતો.
ભારતીય ટીમનો ઓપનિંગ બેટ્સમેન અભિષેક શર્મા શાનદાર ફોર્મમાં છે. તે પાંચ મેચની T20 શ્રેણીમાં ત્રીજા સૌથી વધુ રન બનાવનાર બેટ્સમેન છે. અભિષેકે 4 ઇનિંગ્સમાં 50.67ની એવરેજથી 152 રન બનાવ્યા છે. તેનો સ્ટ્રાઇક રેટ 266 છે. અભિષેકે પ્રથમ મેચમાં 84 રનની ઇનિંગ રમી હતી અને પછી ત્રીજી મેચમાં અણનમ 68 રનની ઇનિંગ રમી હતી. વર્તમાન શ્રેણીમાં સૌથી વધુ રન બનાવવાનો રેકોર્ડ સૂર્યકુમાર યાદવના નામે છે. ભારતીય કેપ્ટને ચાર મેચમાં 179 રન બનાવ્યા છે.
