ઓલ ઈન્ડિયા મજલિસ-એ-ઈત્તેહાદુલ મુસલમીન (AIMIM)ના વડા અસદુદ્દીન ઓવૈસીએ દિલ્હીમાં તુર્કમાન ગેટ અને ફૈઝ-એ-ઈલાહી મસ્જિદ પાસે હાથ ધરવામાં આવેલી અતિક્રમણ વિરોધી ઝુંબેશની નિંદા કરી છે અને કહ્યું છે કે આ કાર્યવાહીથી વકફ મિલકતોને નુકસાન થયું છે. આ અભિયાન વિશે ANI સાથે વાત કરતા ઓવૈસીએ કહ્યું, ‘સત્ય એ છે કે આખી સંપત્તિ વકફની છે અને આ અંગે 1970નું વકફ ગેઝેટ પણ છે, જેમાં એન્ટ્રી નંબર 40માં તેનો ઉલ્લેખ છે.’
‘વક્ફને પક્ષકાર બનાવાયો ન હતો’
તેમણે કહ્યું કે ‘દિલ્હી હાઈકોર્ટે 12મી નવેમ્બરે આ અંગે નિર્ણય સંભળાવ્યો હતો. આશ્ચર્યની વાત એ છે કે આરએસએસ સાથે સંબંધ ધરાવતા સેવ ઈન્ડિયા ફાઉન્ડેશન નામના અરજદાર કોર્ટમાં ગયા હતા. જે બાદ કોર્ટે સર્વે કરવાનો આદેશ આપ્યો હતો, તેમાં MCD, DDA, LDO, રેવન્યુ ડિપાર્ટમેન્ટ અને પોલીસ અધિકારીઓને સામેલ કરવામાં આવ્યા હતા, પરંતુ વક્ફને તેમાં પક્ષકાર બનાવવામાં આવ્યો ન હતો અને કોર્ટે તેની વિરુદ્ધ નિર્ણય કર્યો હતો. જ્યારે કોર્ટ ઇચ્છતી હતી કે વકફ ટ્રિબ્યુનલ આ અંગે નિર્ણય કરે, પરંતુ મામલો ટ્રિબ્યુનલમાં ગયો ન હતો.
‘વક્ફ બોર્ડે રિવ્યુ પિટિશન દાખલ કરવી જોઈએ’
તેમણે વધુમાં કહ્યું કે, ‘દિલ્હી વક્ફ બોર્ડે આ મામલામાં પક્ષકાર બનવું જોઈતું હતું અને 1970ના વકફ ગેઝેટ નોટિફિકેશનનો સંદર્ભ આપવો જોઈતો હતો. પરંતુ આવું થયું નહીં અને જ્યારે કોર્ટનો આદેશ આવ્યો ત્યારે દિલ્હી વક્ફ બોર્ડે કોર્ટના આદેશ સામે રિવ્યુ પિટિશન દાખલ કરવી જોઈતી હતી. પરંતુ આવું કંઈ થયું નહીં, પરિણામે કોર્ટે ખોટો નિર્ણય લીધો.
‘પીડબ્લ્યુએને સાઈડલાઈન કરવામાં આવ્યા છે’
ઓવૈસીએ કહ્યું કે ‘મહત્વની વાત એ છે કે 1991ના પ્લેસ ઓફ વર્શીપ એક્ટ મુજબ, આ જગ્યા 1947માં મસ્જિદ હતી. આવી સ્થિતિમાં, તેઓએ સ્પષ્ટપણે સંસદમાં પસાર થયેલા કાયદાનું સન્માન કર્યું ન હતું. વકફ મિલકતને નુકસાન થયું છે. જે પણ થયું છે તે સાવ ખોટું છે. હવે દિલ્હી વક્ફ બોર્ડ અને તેની મેનેજિંગ કમિટીએ તાત્કાલિક સુપ્રીમ કોર્ટમાં જવું જોઈએ અને તમામ હકીકતો જણાવીને યથાસ્થિતિ જાળવવાના આદેશો લેવા જોઈએ.
જણાવી દઈએ કે, MCD (દિલ્હી મ્યુનિસિપલ કોર્પોરેશન) એ દિલ્હી હાઈકોર્ટના આદેશ બાદ બુધવાર, 7 જાન્યુઆરી, 2026 ના રોજ વહેલી સવારે શહેરના ફૈઝ-એ-ઈલાહી મસ્જિદ, તુર્કમાન ગેટ અને રામલીલા મેદાન પાસે અતિક્રમણ વિરોધી અભિયાન શરૂ કર્યું હતું. આ અભિયાન દરમિયાન પોલીસને સ્થાનિક લોકોના હિંસક વિરોધનો સામનો કરવો પડ્યો હતો. લગભગ 25-30 લોકોએ પોલીસ અને MCD અધિકારીઓ પર પથ્થરમારો કર્યો, જેના પગલે પોલીસે બળપૂર્વક તેમને ભગાડી દીધા અને અતિક્રમણ હટાવ્યું.
