બાંગ્લાદેશમાં ભગવાન રામની વિશાળ 81 ફૂટ ઊંચી પ્રતિમા બનાવનારા હિન્દુ યુવકની ધરપકડ બાદ હોબાળો મચી ગયો છે. યુવકનું નામ હરિદાસ ચંદ્ર તરણી દાસ છે. લઘુમતી સમુદાયો (હિંદુ, બૌદ્ધ અને ખ્રિસ્તીઓ) ના નેતાઓએ આ કાર્યવાહીના વિરોધમાં શનિવારે ઢાકાની નેશનલ પ્રેસ ક્લબની બહાર જોરદાર પ્રદર્શન કર્યું. વિરોધીઓનો સીધો આરોપ છે કે હરિદાસને પ્રતિમાનું બાંધકામ રોકવા માટે મની લોન્ડરિંગના બનાવટી કેસમાં ફસાવીને જેલમાં મોકલવામાં આવ્યો છે.
શું છે સમગ્ર મામલો?
હરિદાસ ચંદ્ર ગાયકબંધ જિલ્લાના પલાશબારી વિસ્તારમાં ભગવાન રામની 81 ફૂટ ઊંચી પ્રતિમા બનાવી રહ્યા હતા. બાંગ્લાદેશના ક્રિમિનલ ઇન્વેસ્ટિગેશન ડિપાર્ટમેન્ટ (CID) એ હરિદાસની 9.35 કરોડ રૂપિયા (બાંગ્લાદેશી ચલણ)ના શંકાસ્પદ વ્યવહારો અને મની લોન્ડરિંગના આરોપસર ધરપકડ કરી છે. પોલીસનો દાવો છે કે હરિદાસ 2010માં ગેરકાયદેસર રીતે ભારતમાં ગયો હતો અને તેણે 2019માં ઈસ્લામ ધર્મ અંગીકાર કર્યો હતો. સ્થાનિક કોર્ટે હરિદાસને ન્યાયિક કસ્ટડીમાં મોકલ્યા ત્યારથી લઘુમતીઓનો ગુસ્સો ફાટી નીકળ્યો હતો.
લઘુમતી નેતાઓએ મોટા આંદોલનની ચેતવણી આપી
બાંગ્લાદેશ હિન્દુ-બૌદ્ધ-ખ્રિસ્તી એકતા પરિષદના નેતૃત્વમાં આ પ્રદર્શનમાં સરકારને સીધી ચેતવણી આપવામાં આવી છે. કાઉન્સિલના જનરલ સેક્રેટરી મનિન્દ્ર કુમાર નાથે હરિદાસની ધરપકડની સખત નિંદા કરતા કહ્યું કે સરકારે તેમને જાણીજોઈને ફસાવ્યા છે. તેમણે સ્પષ્ટ કર્યું કે લઘુમતી સમુદાય કોઈપણ સંજોગોમાં ભગવાન રામની મૂર્તિ બનાવવા માટે આ ધરપકડને સ્વીકારશે નહીં.
સાથે જ કાઉન્સિલના વરિષ્ઠ નેતા સુબ્રત ચૌધરીએ સરકારને અલ્ટીમેટમ આપતા જણાવ્યું હતું કે જો નિર્દોષ હરિદાસને તાત્કાલિક મુક્ત કરવામાં નહીં આવે તો આગામી દિવસોમાં હિંદુ, બૌદ્ધ અને ખ્રિસ્તી સમુદાયો રસ્તા પર ઉતરીને એક થઈને હિંસક આંદોલન કરશે. તેમણે સવાલ ઉઠાવ્યો હતો કે દેશમાં જ્યારે સૌહાર્દનું વાતાવરણ સર્જાઈ રહ્યું છે ત્યારે સરકારને અસ્વસ્થ બનાવવા કોના ઈશારે આવા ષડયંત્રો રચાઈ રહ્યા છે?
