ભારતીય ટીમનો ફાસ્ટ બોલર હર્ષિત રાણા ઘૂંટણની ઈજાને કારણે T20 વર્લ્ડ કપમાંથી બહાર થઈ ગયો છે. ભારતીય કેપ્ટન સૂર્યકુમારે પ્રેસ કોન્ફરન્સમાં જણાવ્યું કે હર્ષિત સંપૂર્ણપણે ફિટ નથી. ટીમ અત્યારે હર્ષિતના રિપ્લેસમેન્ટ માટે વધુ સારો વિકલ્પ શોધી રહી છે. ઝડપી બોલર હર્ષિતને દક્ષિણ આફ્રિકા સામેની પ્રેક્ટિસ મેચ દરમિયાન ઘૂંટણમાં ઈજા થઈ હતી. હર્ષિત છેલ્લા કેટલાક સમયથી ભારતીય T20 ટીમનો નિયમિત સભ્ય છે અને તેને ટૂર્નામેન્ટમાંથી બાકાત રાખવો એ ભારત માટે મોટો ફટકો છે.
ઈન્ડિયા ટુડેના અહેવાલ મુજબ, ભારતીય ઝડપી બોલર હર્ષિત રાણા બુધવારે નવી મુંબઈમાં દક્ષિણ આફ્રિકા સામેની ટીમની પ્રેક્ટિસ મેચ દરમિયાન ઈજાને કારણે T20 વર્લ્ડ કપમાંથી બહાર થઈ ગયો છે. ભારતીય ટીમના કેપ્ટન સૂર્યકુમાર યાદવે પ્રેસ કોન્ફરન્સ દરમિયાન કહ્યું છે કે હર્ષિત રાણાની ફિટનેસ પર નજર રાખવામાં આવી રહી છે અને સાંજ સુધીમાં અંતિમ નિર્ણય લેવામાં આવશે. જો કે રિપોર્ટ અનુસાર તેના માટે ટૂર્નામેન્ટ રમવી મુશ્કેલ છે.
હર્ષિતને સર્જરી કરાવવી પડશે
ભારતના સ્ટાર ખેલાડી હર્ષિત રાણાને દક્ષિણ આફ્રિકા સામેની T20 વર્લ્ડ કપ 2026ની પ્રેક્ટિસ મેચ દરમિયાન ઈજા થઈ હતી. ઈજા થયા બાદ તે બે વખત રન અપ લીધા બાદ બોલિંગ કરી શક્યો ન હતો. આ પછી તે ઘૂંટણ પકડીને મેદાનની બહાર નીકળી ગયો હતો.
રિપોર્ટ અનુસાર, હર્ષિતના મેડિકલ ડોક્યુમેન્ટ્સમાં જાણવા મળ્યું છે કે તેના જમણા ઘૂંટણમાં સોજો હતો, હલનચલનમાં તકલીફ હતી અને બાજુની સાંધાની લાઇનમાં દુખાવો હતો. પાછળથી સ્કેન દ્વારા લેટરલ મેનિસ્કસ ફાટી જવાની પુષ્ટિ થઈ, અને ડૉક્ટરની સલાહ લીધા પછી, રાણાને શસ્ત્રક્રિયા કરાવવાની સલાહ આપવામાં આવી, જેનાથી તે આગામી T20 વર્લ્ડ કપમાંથી બહાર થઈ જશે.
