ભારતીય ક્રિકેટ બોર્ડે ન્યુઝીલેન્ડ સામેની આગામી T20 શ્રેણી માટે ટીમમાં મોટો ફેરફાર કર્યો છે. સ્ટાર ઓલરાઉન્ડર વોશિંગ્ટન સુંદર ઈજાના કારણે શ્રેણીમાંથી બહાર થઈ ગયો છે. ઈજાગ્રસ્ત તિલક વર્માના સ્થાને ટીમના સ્ટાર બેટ્સમેન શ્રેયસ અય્યરને ટીમમાં સામેલ કરવામાં આવ્યો છે. શ્રેયસને પ્રથમ ત્રણ મેચ માટે તિલક વર્માની જગ્યાએ ટીમમાં જગ્યા આપવામાં આવી છે. વોશિંગ્ટન સુંદરની જગ્યાએ રવિ બિશ્નોઈની ટીમમાં પસંદગી કરવામાં આવી છે.
સ્ટાર ઓલરાઉન્ડર વોશિંગ્ટન સુંદરને ‘સાઇડ સ્ટ્રેન’ ઈજાના કારણે 21 જાન્યુઆરીથી શરૂ થનારી 5 મેચની T20 શ્રેણીમાંથી સત્તાવાર રીતે બહાર કરવામાં આવ્યો છે. સુંદરને વડોદરામાં રમાયેલી પ્રથમ વનડે દરમિયાન આ ઈજા થઈ હતી. બીસીસીઆઈના સૂત્રોના જણાવ્યા અનુસાર સુંદરની ઈજા ઘણી ગંભીર છે અને તેને સંપૂર્ણ સ્વસ્થ થવામાં સમય લાગશે. સુંદર અગાઉ ODI શ્રેણીની બાકીની મેચોમાંથી બહાર થઈ ગયો હતો, જ્યાં તેની જગ્યાએ આયુષ બદોનીનો સમાવેશ કરવામાં આવ્યો હતો.
બોર્ડ ઓફ કંટ્રોલ ફોર ક્રિકેટ ઇન ઇન્ડિયાએ વોશિંગ્ટનની ઇજાને “ડાબી બાજુની નીચેની પાંસળીમાં અચાનક અસ્વસ્થતા” તરીકે વર્ણવ્યું હતું, જોકે તે હજુ સુધી સ્પષ્ટ નથી કે તે વર્લ્ડ કપ માટે સંપૂર્ણ રીતે ફિટ થશે કે કેમ. મુંબઈમાં T-20 વર્લ્ડ કપની શરૂઆતની મેચમાં ભારતનો સામનો અમેરિકા સામે થવાનો છે.
ન્યૂઝીલેન્ડ સામેની ટી20 શ્રેણીમાં વોશિંગ્ટનની ગેરહાજરીથી ભારતીય કેમ્પ ચિંતિત નથી. હાર્દિક પંડ્યા, અભિષેક શર્મા અને શિવમ દુબે સહિત ઘણા ઓલરાઉન્ડર આગામી સપ્તાહે ટીમ સાથે જોડાવા જઈ રહ્યા છે. આ સિવાય અક્ષર પટેલ પણ વાપસી કરી રહ્યો છે, જે ન્યુઝીલેન્ડ શ્રેણી અને T20 વર્લ્ડ કપ બંનેમાં વાઇસ-કેપ્ટનની ભૂમિકા નિભાવશે. જો કે ટીમને વધુ એક આંચકો લાગ્યો છે. વોશિંગ્ટન ઉપરાંત, તિલક વર્મા પણ જંઘામૂળની ઈજાની સર્જરી કરાવ્યા બાદ પ્રથમ ત્રણ T20 મેચો માટે ઉપલબ્ધ રહેશે નહીં.
લાંબા સમયથી ટૂંકા ફોર્મેટની ટીમમાંથી બહાર રહેલા શ્રેયસ અય્યરની વાપસી મિડલ ઓર્ડરને સ્થિરતા આપશે. તાજેતરમાં સ્થાનિક ક્રિકેટમાં તેના સારા ફોર્મને ધ્યાનમાં રાખીને તેને આ તક મળી છે. વિશ્વના સર્વશ્રેષ્ઠ T20 સ્પિનરોમાંથી એક બિશ્નોઈને સુંદરના વિકલ્પ તરીકે સામેલ કરવામાં આવ્યો છે.
