કેનેડાના ટોરોન્ટો શહેરમાં ભારતીય મૂળની યુવતીની ઘાતકી હત્યાના કિસ્સાએ NRI સમુદાયને ચોંકાવી દીધો છે. ટોરોન્ટોમાં ભારતીય વાણિજ્ય દૂતાવાસે બુધવારે આ ઘટના પર ઊંડું દુઃખ અને આઘાત વ્યક્ત કર્યો હતો અને પીડિત પરિવાર પ્રત્યે સંવેદના વ્યક્ત કરી હતી. આ કેસમાં પોલીસ અબ્દુલ ગફૂરી નામના વ્યક્તિની શોધ કરી રહી છે.
કોન્સ્યુલેટે સોશિયલ મીડિયા પ્લેટફોર્મ ‘X’ પર જારી કરેલા એક નિવેદનમાં કહ્યું છે કે તે ટોરોન્ટોમાં ભારતીય નાગરિક હિમાંશી ખુરાનાની હત્યાથી અત્યંત દુઃખી અને આઘાતમાં છે. દૂતાવાસે આ મુશ્કેલ સમયમાં શોકગ્રસ્ત પરિવાર પ્રત્યે ઊંડી સંવેદના વ્યક્ત કરી હતી અને ખાતરી આપી હતી કે આ મામલે સ્થાનિક વહીવટીતંત્ર સાથે સંકલન કરીને પરિવારને તમામ શક્ય સહાય પૂરી પાડવામાં આવી રહી છે.
પોલીસ તપાસ અને આરોપીની શોધ ચાલુ છે
આ નિવેદન પહેલા ટોરોન્ટો પોલીસે માહિતી આપી હતી કે શહેરમાં ભારતીય મૂળની 30 વર્ષીય મહિલા મૃત હાલતમાં મળી આવી છે. પોલીસના જણાવ્યા અનુસાર, મૃતકની ઓળખ હિમાંશી ખુરાના તરીકે થઈ છે, જે ટોરોન્ટોની રહેવાસી છે. આ કેસમાં પોલીસે 32 વર્ષીય અબ્દુલ ગફૂરી વિરુદ્ધ કેનેડા વ્યાપી ધરપકડ વોરંટ જારી કર્યું છે, જે મૃતકને પહેલેથી જ ઓળખતો હતો.
પોલીસે જણાવ્યું કે આરોપી ફર્સ્ટ ડિગ્રી મર્ડરના આરોપમાં વોન્ટેડ છે. જો કોર્ટમાં એવું સાબિત થાય કે હત્યા પૂર્વયોજિત હતી અને સ્પષ્ટ ગુનાહિત ઈરાદો હતો, તો આરોપીને પેરોલ વિના આજીવન કેદની સજા થઈ શકે છે.
અંગત સંબંધોથી સંબંધિત હિંસાની શંકા
કેનેડિયન મીડિયા ઓર્ગેનાઈઝેશન સીબીસી ન્યૂઝના રિપોર્ટ અનુસાર તપાસકર્તાઓનું માનવું છે કે આ મામલો ઈન્ટિમેટ પાર્ટનર હિંસાનો હોઈ શકે છે એટલે કે અંગત અથવા નજીકના સંબંધો સંબંધિત હિંસા. પોલીસે એ પણ પુષ્ટિ કરી છે કે પીડિતા અને શંકાસ્પદ વ્યક્તિ એકબીજાને ઓળખે છે.
