આ વર્ષે યોજાનારી વિધાનસભાની ચૂંટણી પહેલા તમિલનાડુમાં રાજકીય ગરમાવો વધી ગયો છે. મુખ્ય પ્રધાન એમકે સ્ટાલિનની આગેવાની હેઠળની શાસક પક્ષ દ્રવિડ મુનેત્ર કઝગમ (DMK) એ સાથી કોંગ્રેસને 234 સભ્યોની વિધાનસભામાં માત્ર 32 બેઠકો પર ચૂંટણી લડવાની ઓફર કરી છે. જેને લઈને કોંગ્રેસ નારાજ થઈ ગઈ છે. કોંગ્રેસના નેતાઓ હવે અન્ય વિકલ્પો શોધવા લાગ્યા છે. ઇન્ડિયા ટુડેના અહેવાલમાં જણાવાયું છે કે તામિલનાડુ કોંગ્રેસના કેટલાક નેતાઓ આગામી વિધાનસભા ચૂંટણી માટે અભિનેતામાંથી રાજકારણી બનેલા વિજયની પાર્ટી TVK સાથે જોડાણની શક્યતાઓ શોધવા માટે ટોચના નેતૃત્વ, ખાસ કરીને રાહુલ ગાંધીને વિનંતી કરવાની તૈયારી કરી રહ્યા છે.
આ સ્થિતિ સીએમ સ્ટાલિન માટે તણાવનું કારણ બની શકે છે. વાસ્તવમાં, તેના આંતરિક સર્વે અનુસાર, કોંગ્રેસ પાર્ટીએ 40 બેઠકોનો લક્ષ્યાંક રાખ્યો હતો પરંતુ ડીએમકેએ તેને માત્ર 32 બેઠકોની ઓફર કરી છે. હવે આટલા તણાવ બાદ કોંગ્રેસ 38 સીટો સુધી પહોંચવામાં સફળ રહી છે પરંતુ સ્ટાલિનની પાર્ટી ડગતી નથી. તેથી કોંગ્રેસે અન્ય વિકલ્પોની શોધ તેજ કરી છે. આ સંદર્ભમાં, કોંગ્રેસના કેટલાક નેતાઓ વિજયની પાર્ટી તમિલગા વેત્રી કઝગમ (TVK) સાથે સંભવિત જોડાણનો મુદ્દો પાર્ટી નેતૃત્વ, ખાસ કરીને રાહુલ ગાંધી સમક્ષ મૂકવાની તૈયારી કરી રહ્યા છે.
સત્તામાં પણ ભાગીદારીની માંગ
કોંગ્રેસ સાંસદ મણિકમ ટાગોરે સોમવારે સ્પષ્ટપણે કહ્યું હતું કે પાર્ટી માત્ર સીટો સુધી સીમિત રહેવા માંગતી નથી, પરંતુ જો ગઠબંધન સત્તામાં આવે તો સરકારમાં ભાગીદારી પણ ઈચ્છે છે. તેમના નિવેદનને પાર્ટી કાર્યકર્તાઓના દબાણ અને ચૂંટણી પહેલા વ્યૂહાત્મક પરિવર્તન તરીકે જોવામાં આવી રહ્યું છે.
TVK કોંગ્રેસને ‘કુદરતી સાથી’ ગણાવી
ટાગોરનું નિવેદન એવા સમયે આવ્યું છે જ્યારે અભિનેતામાંથી રાજનેતા બનેલા વિજયની પાર્ટી TVKએ કોંગ્રેસને તેની ‘કુદરતી સાથી’ ગણાવી છે. જેના કારણે તમિલનાડુના રાજકારણમાં નવા સમીકરણોની ચર્ચાએ જોર પકડ્યું છે. ટીવીકેના પ્રવક્તા ફેલિક્સ ગેરાલ્ડે જણાવ્યું હતું કે વિજય અને રાહુલ ગાંધી વચ્ચે મૈત્રીપૂર્ણ સંબંધો છે અને કોંગ્રેસ સાથે ગઠબંધનની સંભાવના ઘણી વધારે છે. જો કે, તેમણે એમ પણ કહ્યું કે તમિલનાડુ કોંગ્રેસના આંતરિક હિતોને કારણે વાતચીતમાં વિલંબ થઈ શકે છે.
