તાજેતરમાં જ યુરોપિયન દેશ ફ્રાંસમાં મુસ્લિમ સમુદાયના લોકોના મોટી સંખ્યામાં એકઠા થવા પર પ્રતિબંધ લાદવામાં આવ્યો છે. અહીં અધિકારીઓએ પેરિસ વિસ્તારમાં મુસ્લિમોના એકઠા થવા પર પ્રતિબંધ લગાવી દીધો છે. તેની પાછળ સુરક્ષા કારણો જણાવવામાં આવ્યા છે. દેશના ટોચના પોલીસ અધિકારીએ ગુરુવારે આ માહિતી આપી.
પેરિસ પોલીસ વડા પેટ્રિસ ફૌરે સોશિયલ મીડિયા પ્લેટફોર્મ X પર એક પોસ્ટમાં જણાવ્યું હતું કે પરિસ્થિતિ વધુ બગડવાની સંભાવનાને ધ્યાનમાં રાખીને આ નિર્ણય લેવામાં આવ્યો છે. “આંતરિક મંત્રી લોરેન્ટ નુનેઝની વિનંતી પર, મેં પેરિસ-લે બોર્જેટ પ્રદર્શન કેન્દ્રમાં 3 એપ્રિલથી 6 એપ્રિલ દરમિયાન યોજાનારી ‘ફ્રાન્સના મુસ્લિમોની વાર્ષિક સભા’ની 40મી આવૃત્તિ પર પ્રતિબંધ મૂકતો આદેશ જારી કર્યો છે,” તેમણે કહ્યું.
હિજાબ અને બુરખા પર પ્રતિબંધ છે
તેમણે વધુમાં કહ્યું કે, “આ નિર્ણય રાષ્ટ્રીય અને આંતરરાષ્ટ્રીય વાતાવરણને ધ્યાનમાં રાખીને લેવામાં આવ્યો છે જેમાં તણાવ ખૂબ જ વધારે છે, આતંકવાદી હુમલાની ચેતવણી છે, જાહેર વ્યવસ્થા ખોરવાઈ જવાનો ભય છે. આગામી દિવસોમાં મોટી સંખ્યામાં પોલીસ દળોને રસ્તાઓ પર તૈનાત કરવામાં આવશે.” ઉલ્લેખનીય છે કે ફ્રાન્સમાં મુસ્લિમોની વસ્તી લગભગ 50 થી 60 લાખ છે જે દેશની વસ્તીના લગભગ 9 થી 10 ટકા છે. અહીં કડક ધર્મનિરપેક્ષ નિયમો અમલમાં છે, જે અંતર્ગત જાહેર સ્થળોએ હિજાબ, બુરખા અને નકાબ જેવી વસ્તુઓ પર પ્રતિબંધ છે.
સંસ્થા અપીલ કરશે
કાર્યક્રમ રદ્દ થયા બાદ મુસ્લિમ સંગઠનના વડા મખલોફ મામેચે પ્રતિબંધના આદેશની પુષ્ટિ કરી છે. તેમણે કહ્યું કે તેમની સંસ્થા આ નિર્ણય સામે કાનૂની અપીલ દાખલ કરશે. અગાઉ, ફ્રાન્સમાં બેંક ઓફ અમેરિકાની ઓફિસમાં બોમ્બ ધડાકાના નિષ્ફળ પ્રયાસ બાદ ફ્રાન્સે સમગ્ર પેરિસમાં સંવેદનશીલ સ્થળોએ સુરક્ષા વધારી દીધી હતી. આ ઘટના અમેરિકા, ઈઝરાયેલ અને ઈરાન વચ્ચે શરૂ થયેલા યુદ્ધ પછી બની હતી.
