તમિલનાડુના શિવગંગાઈ જિલ્લામાં રવિવારે બે બસ વચ્ચેની જોરદાર ટક્કરમાં ઓછામાં ઓછા 11 લોકોના મોત થયા હતા અને લગભગ 40 લોકો ઘાયલ થયા હતા. પોલીસના જણાવ્યા અનુસાર, આ દુ:ખદ અકસ્માત તિરુપત્તુર પાસે કુમમાનગુડી રોડ પર થયો હતો. મૃતકોમાં એક બાળકનો પણ સમાવેશ થાય છે. એક બસ તિરુપુરથી કરાઈકુડી જઈ રહી હતી, જ્યારે બીજી બસ કરાઈકુડીથી ડિંડીગુલ જઈ રહી હતી.
અકસ્માતની પુષ્ટિ કરતા શિવગંગા જિલ્લા પોલીસ અધિક્ષક શિવ પ્રસાદે જણાવ્યું હતું કે અથડામણની માહિતી મળતા જ ઘટનાસ્થળે રાહત અને બચાવ કામગીરી શરૂ કરવામાં આવી હતી. પ્રત્યક્ષદર્શીઓના જણાવ્યા અનુસાર, ટક્કર એટલી જોરદાર હતી કે ઘટનાસ્થળે હોબાળો મચી ગયો હતો અને પોલીસકર્મીઓ અને સ્થાનિક લોકો ઘાયલોને બચાવવા દોડી આવ્યા હતા.
પોલીસ અધિકારીઓએ જણાવ્યું કે અથડામણને કારણે બંને વાહનોનો આગળનો ભાગ સંપૂર્ણપણે ક્ષતિગ્રસ્ત થઈ ગયો હતો. આ અકસ્માતમાં અનેક મુસાફરોના ઘટનાસ્થળે જ મોત થયા હતા. પોલીસના જણાવ્યા અનુસાર, અકસ્માતની માહિતી મળતાની સાથે જ પોલીસ ઘટનાસ્થળે પહોંચી ગઈ હતી અને ઘાયલોને તરત જ શિવગંગાઈ જિલ્લા હોસ્પિટલમાં લઈ જવામાં આવ્યા હતા, જ્યાં ડોક્ટરોએ જણાવ્યું હતું કે ઘાયલોમાંથી ઘણાની હાલત હજુ પણ ગંભીર છે.
આ દુર્ઘટના બાદ તમિલનાડુના મુખ્યમંત્રી એમકે સ્ટાલિને આ દુર્ઘટના પર ઊંડો શોક વ્યક્ત કર્યો છે અને અધિકારીઓને ઘાયલોને તાત્કાલિક સારી સારવાર આપવા તેમજ મૃતકોના પરિવારજનોને શક્ય તમામ સહાય પૂરી પાડવા સૂચના આપી છે.
