ભારત અને ન્યુઝીલેન્ડ વચ્ચે ત્રણ મેચની વનડે સીરીઝ રમાઈ રહી છે. પ્રથમ મેચ ભારતે જીતી હતી જ્યારે બીજી વનડેમાં ન્યૂઝીલેન્ડે જોરદાર પ્રદર્શન કરીને શ્રેણીમાં વાપસી કરી હતી અને મેચ જીતી લીધી હતી. ત્રીજી અને નિર્ણાયક વનડે રવિવારે ઈન્દોરના હોલકર સ્ટેડિયમમાં રમાશે. આ મેચ માટે બંને ટીમો પહોંચી ગઈ છે. બંને ટીમોએ છેલ્લી મેચની તૈયારીઓ પણ શરૂ કરી દીધી છે. ભારતના બેટ્સમેનોનું પ્રદર્શન અપેક્ષા મુજબનું નહોતું અને બેટ્સમેનો ફાઈનલ મેચમાં તેને સુધારવા ઈચ્છશે.
વડોદરામાં ભારતે પ્રથમ વનડે 4 વિકેટે જીતી હતી જ્યારે રાજકોટમાં રમાયેલી બીજી વનડેમાં ન્યુઝીલેન્ડે 7 વિકેટે શાનદાર જીત નોંધાવી હતી. ડેરીલ મિશેલની સદી અને વિલ યંગ સાથેની તેની 162 રનની ભાગીદારીએ ન્યૂઝીલેન્ડને લક્ષ્યાંકનો પીછો કરવામાં મદદ કરી અને શ્રેણીને નિર્ણાયક તરફ લઈ ગઈ. ઈન્દોરનું હોલ્કર સ્ટેડિયમ બેટ્સમેનો માટે મદદરૂપ છે. નાની બાઉન્ડ્રીના કારણે ઘણા રન બને છે. ભારત અને ન્યુઝીલેન્ડની ટીમો શુક્રવારે નેટ પ્રેક્ટિસ કરશે, જ્યાં ખેલાડીઓ પિચ અને પરિસ્થિતિઓનું મૂલ્યાંકન કરશે.
ડેરિલ મિશેલની અણનમ 131 રનની ઇનિંગને કારણે બીજી વનડેમાં 285 રનના લક્ષ્યાંકનો પીછો કરતી વખતે ન્યૂઝીલેન્ડે સાત વિકેટે જીત મેળવીને વનડે શ્રેણી 1-1થી બરાબર કરી લીધી હતી. ભારતીય સ્પિન બોલરો ફરી એકવાર હોમ ગ્રાઉન્ડ પર પ્રભાવ પાડી શક્યા નથી. કુલદીપ યાદવ અને રવિન્દ્ર જાડેજા ઘણા મોંઘા સાબિત થયા હતા. નવોદિત ડાબોડી સ્પિનર જેડન લેનોક્સે ભારતીય બેટ્સમેનો પર ઉત્તમ નિયંત્રણ રાખ્યું અને 10 ઓવરમાં 42 રન આપીને એક વિકેટ લીધી. તેનાથી વિપરીત, કુલદીપ યાદવ (10 ઓવર, 82 રન, એક વિકેટ) અને રવિન્દ્ર જાડેજા (આઠ ઓવરમાં 44 રન) એ 18 ઓવરમાં 126 રન આપ્યા હતા.
50 ઓવરની આ મેચમાં ન્યુઝીલેન્ડની જીતે ફરી એક વખત તે સમસ્યાનો પર્દાફાશ કર્યો છે જેની સાથે ભારત છેલ્લા બે વર્ષથી ટેસ્ટ ક્રિકેટમાં સંઘર્ષ કરી રહ્યું છે. છેલ્લા કેટલાક સમયથી ઘરઆંગણામાં ભારતીય સ્પિન આક્રમણ મુલાકાતી ટીમના સ્પિનરો સામે નબળું પડી રહ્યું છે.
