ભારતે ગુરુવારે ઢાકામાં તેના વિઝા એપ્લીકેશન સેન્ટરની કામગીરી ફરી શરૂ કરી હતી, જે સુરક્ષાની ચિંતાઓને કારણે એક દિવસ અગાઉ બંધ કરી દેવામાં આવી હતી. જો કે, બાંગ્લાદેશના અન્ય ભાગોમાં સ્થિત અન્ય બે સમાન કેન્દ્રો બંધ કરવામાં આવ્યા છે. તે જ સમયે, ભારત વિરોધી પ્રદર્શનકારીઓએ ત્યાં ભારતીય મિશન તરફ કૂચ કરવાનો પ્રયાસ કર્યો.
દક્ષિણ-પશ્ચિમ ખુલના અને ઉત્તર-પશ્ચિમ રાજશાહીમાં સ્થિત ભારતીય વિઝા એપ્લિકેશન કેન્દ્રો (IVACs) સુરક્ષા ચિંતાઓને કારણે બંધ કરવામાં આવ્યા હતા. આ કેન્દ્રો તરફ વિરોધ કૂચને ધ્યાનમાં રાખીને આ પગલું લેવામાં આવ્યું છે. રાજશાહીમાં, “ભારત વિરોધી 36 જુલાઈ ફોરમ” એ ભારતીય સહાયક ઉચ્ચાયોગ તરફ કૂચ કરવાનો પ્રયાસ કર્યો, પરંતુ રમખાણ વિરોધી સાધનોથી સજ્જ પોલીસે તેમને મિશનની નજીક અટકાવ્યા. જ્યારે વિરોધીઓએ સુરક્ષા બેરિકેડ તોડવાનો પ્રયાસ કર્યો ત્યારે ટૂંકી અથડામણ થઈ.
સોશિયલ મીડિયા પર ઉપલબ્ધ વીડિયો અનુસાર પ્રદર્શનકારીઓએ ભારત વિરોધી નારા લગાવ્યા હતા. ખુલનામાં, ‘ભારતીય આધિપત્ય સામે એકતા’ લખેલા બેનર હેઠળ વિરોધીઓએ ભારતીય સહાયક હાઈ કમિશન તરફ કૂચ કરવાનો પ્રયાસ કર્યો, પરંતુ પોલીસ સાથે સૈન્યના કર્મચારીઓ અને નૌકાદળના નાવિકોએ વિરોધીઓને રોકવા માટે ચાર્જ સંભાળ્યો.
ખુલનાના ડેપ્યુટી કમિશનર ઓફ પોલીસ તાજ-ઉલ-ઈસ્લામે જણાવ્યું હતું કે, “અમે ચુસ્ત બંદોબસ્ત રાખ્યો હતો અને દેખાવકારોને મિશન તરફ આગળ વધતા અટકાવ્યા હતા. શાંતિપૂર્ણ રેલી યોજ્યા બાદ તેઓ સ્થળ છોડી ગયા હતા.” અહેવાલો અનુસાર બંને રેલીઓમાં પ્રદર્શનકારીઓએ ભારત પર હાંકી કાઢવામાં આવેલા વડા પ્રધાન શેખ હસીનાને આશ્રય આપવાનો આરોપ મૂક્યો હતો અને તેમને તાત્કાલિક પરત ફરવાની અને ફાંસી આપવાની માંગ કરી હતી.
વિદ્યાર્થીઓની આગેવાની હેઠળના હિંસક વિરોધને પગલે હસીના ગયા વર્ષે ભારત ભાગી ગઈ હતી. નવેમ્બરમાં, સ્પેશિયલ ટ્રિબ્યુનલે હસીનાને માનવતા વિરુદ્ધ અપરાધો કરવા બદલ મૃત્યુદંડની સજા સંભળાવી હતી. બાંગ્લાદેશમાં પાંચ IVAC કેન્દ્રો છે. ઢાકા, ખુલના અને રાજશાહી ઉપરાંત, અન્ય બે કેન્દ્રો ઉત્તરપૂર્વીય બંદર શહેર ચટ્ટોગ્રામ અને સિલ્હેટમાં સ્થિત છે. ઢાકાના જમુના ફ્યુચર પાર્કમાં સ્થિત IVAC, રાજધાનીમાં તમામ ભારતીય વિઝા સેવાઓ માટેનું મુખ્ય સંકલિત કેન્દ્ર છે.
