૩૭ જંકશન તૈયાર, ૧૨ પર કામ ચાલુ – ૭૬ સ્થળોએ ‘લેફ્ટ ટર્ન ફ્રી’થી ટ્રાફિક મૂવમેન્ટમાં રાહત
અમદાવાદ, (પ્રતિનિધિ )અમદાવાદ શહેરમાં વધતા ટ્રાફિક ભારણને ધ્યાનમાં રાખીને અમદાવાદ મ્યુનિસિપલ કોર્પોરેશન દ્વારા ટ્રાફિક મૂવમેન્ટ સરળ અને સુવ્યવસ્થિત બનાવવા માટે શહેરના ટ્રાફિકથી સૌથી વધુ પ્રભાવિત એવા ૧૦૦ જંકશનોના ડેવલપમેન્ટનો મહત્ત્વાકાંક્ષી પ્રોજેક્ટ હાથ ધરવામાં આવ્યો છે.
આ પ્રોજેક્ટ અંતર્ગત વિવિધ પ્રતિષ્ઠિત શૈક્ષણિક સંસ્થાઓ પાસેથી ટ્રાફિક સર્વે કરાવી ડિઝાઇન તૈયાર કરવામાં આવી રહી છે તેમજ ટ્રાફિક પોલીસ વિભાગની જરૂરી અમદાવાદ મ્યુ. કોર્પો. મેળવી જંકશન ડેવલપમેન્ટની કામગીરી અમલમાં મુકાઈ રહી છે.
અત્યારસુધીમાં કુલ ૩૭ જંકશનોનું સફળતાપૂર્વક ડેવલપમેન્ટ પૂર્ણ કરવામાં આવ્યું છે, જ્યારે ૧૨ જંકશનો પર કામ પ્રગતિમાં છે. બાકીના જંકશનો માટે સર્વે અને ડિઝાઇનની કામગીરી ઝડપી ગતિએ આગળ ચાલી રહી છે. આ પ્રોજેક્ટનો મુખ્ય હેતુ ટ્રાફિકની અવરજવર સરળ બનાવવાનો, અકસ્માતોમાં ઘટાડો લાવવાનો અને શહેરના મુખ્ય માર્ગો પર વાહનવ્યવહારને વધુ કાર્યક્ષમ બનાવવાનો છે.
તે ઉપરાંત, શહેરના વિવિધ વ્યસ્ત જંકશનો પર ‘લેફ્ટ ટર્ન ફ્રી’ કરવાની કામગીરી પણ હાથ ધરવામાં આવી છે, જેના પરિણામે વાહનચાલકોને ટ્રાફિક સિગ્નલ પર ઓછો સમય રોકાવું પડે છે અને ટ્રાફિકનું દબાણ ઘટે છે. અત્યાર સુધીમાં કુલ ૭૬ જંકશનો પર લેફ્ટ ટર્ન ફ્રી સુવિધા સફળતાપૂર્વક અમલમાં મુકાઈ છે.
ટ્રાફિક વ્યવસ્થાને વધુ મજબૂત બનાવવા માટે ચાલુ વર્ષ દરમિયાન રોડ સેફ્ટી અને માર્ગદર્શક ચિહ્નો પર વિશેષ ધ્યાન આપવામાં આવ્યું છે. જેમાં રોડ પર સેન્ટર લાઈન, કર્બલાઈન, ઝેબ્રા ક્રોસિંગ, એડ્જ લાઈન તેમજ સ્ટેન્સિલ વર્ક સહિત કુલ ૧,૧૯,૦૦૦ ચો.મી. વિસ્તારમાં થર્મોપ્લાસ્ટિક પેઇન્ટિંગનું કામ પૂર્ણ કરવામાં આવ્યું છે.
આ સાથે જ ઇન્ફોર્મેટરી, કાશનરી, મૅન્ડેટરી અને ડિરેક્શનલ બોર્ડ સહિત આશરે ૬૯૦૦ જેટલા ટ્રાફિક સાઇનબોર્ડ લગાવવામાં આવ્યા છે, જે વાહનચાલકોને માર્ગદર્શન આપવાના સાથે સલામતીમાં પણ વધારો કરે છે. AMC દ્વારા હાથ ધરાયેલા આ વિવિધ પ્રયાસો શહેરમાં ટ્રાફિક વ્યવસ્થાને વધુ સુવ્યવસ્થિત, સુરક્ષિત અને સ્માર્ટ બનાવવા તરફનો મહત્વપૂર્ણ પગથિયું સાબિત થઈ રહ્યું છે.
