અંડર-19 વર્લ્ડ કપમાં શુક્રવારે ઈંગ્લેન્ડ સામે પ્રથમ બેટિંગ કરવા ઉતરેલી ભારતીય ટીમે 50 ઓવરમાં 9 વિકેટ ગુમાવીને 411 રન બનાવ્યા હતા. આ સાથે ભારતીય ટીમ અંડર-19 વર્લ્ડ કપ ફાઇનલમાં સૌથી વધુ સ્કોર ધરાવતી ટીમ બની ગઈ છે. આ પહેલા ટૂર્નામેન્ટની ફાઇનલમાં સૌથી વધુ સ્કોર ઓસ્ટ્રેલિયાના નામે હતો જેણે 2024માં ભારત સામે સાત વિકેટ ગુમાવીને 253 રન બનાવ્યા હતા.ભારત માટે વૈભવ સૂર્યવંશીએ 175 રનની વિસ્ફોટક ઇનિંગ રમી હતી. કેપ્ટન આયુષ મ્હાત્રેએ 53 રનનું યોગદાન આપ્યું હતું.
ભારતે ત્રીજી વખત 400 પ્લસનો સ્કોર બનાવ્યો
ભારતીય ટીમે અંડર-19 વર્લ્ડ કપના ઈતિહાસમાં અત્યાર સુધીમાં ત્રણ વખત 400થી વધુ રન બનાવ્યા છે. આવું કરનારી ભારત એકમાત્ર ટીમ છે. ઓસ્ટ્રેલિયા, ઈંગ્લેન્ડ અને દક્ષિણ આફ્રિકા જેવી ટીમો હજુ સુધી આ સિદ્ધિ હાંસલ કરી શકી નથી. 2004માં ઢાકામાં સ્કોટલેન્ડ સામે રમાયેલી મેચમાં ભારતે 50 ઓવરમાં 3 વિકેટ ગુમાવીને 425 રન બનાવ્યા હતા. 2022માં ટીમે યુગાન્ડા સામે 5 વિકેટ ગુમાવીને 405 રન બનાવ્યા હતા. જ્યારે 2026માં ઈંગ્લેન્ડ સામે ભારતે 50 ઓવરમાં 9 વિકેટ ગુમાવીને 411 રન બનાવ્યા હતા.
સૂર્યવંશીએ અંડર-19 વર્લ્ડ કપના ઈતિહાસમાં બીજી સૌથી ઝડપી સદી ફટકારી હતી, જેના માટે તેણે માત્ર 55 બોલ રમ્યા હતા. સૂર્યવંશીએ 80 બોલમાં 15 ચોગ્ગા અને 15 છગ્ગા સાથે 175 રન બનાવ્યા હતા, જ્યારે મ્હાત્રે તેની 51 બોલની ઇનિંગમાં સાત ચોગ્ગા અને બે છગ્ગા ફટકાર્યા હતા. આ બે સિવાય વિકેટકીપર બેટ્સમેન અભિજ્ઞાન કુંડુએ 40 રન, કનિષ્ક ચૌહાણે 37 અણનમ રન, વેદાંત ત્રિવેદીએ 32 રન અને વિહાન મલ્હોત્રાએ 30 રનનું યોગદાન આપ્યું હતું. ઈંગ્લેન્ડ તરફથી જેમ્સ મિંટોએ ત્રણ જ્યારે સેબેસ્ટિયન મોર્ગન અને એલેક્સ ગ્રીને બે-બે વિકેટ ઝડપી હતી.
વૈભવ સૂર્યવંશીએ 80 બોલમાં 175 રનમાં 15 ચોગ્ગા અને 15 છગ્ગા ફટકાર્યા હતા. તેની સાથે ક્રિઝ પર ભારત 500 રન તરફ આગળ વધી રહ્યું હોય તેવું લાગી રહ્યું હતું, પરંતુ ઇંગ્લેન્ડે છેલ્લી 10 ઓવરમાં શાનદાર વાપસી કરી હતી. ઈંગ્લેન્ડ તરફથી જેમ્સ મિંટોએ ત્રણ વિકેટ ઝડપી હતી. સેબેસ્ટિયન મોર્ગન અને એલેક્સ ગ્રીનને બે-બે વિકેટ મળી હતી. મેની લમ્સડેને એક બેટ્સમેનને આઉટ કર્યો હતો.
