લખનૌ. બે ઘરેલુ ગેસ સિલિન્ડરમાં થયેલા બ્લાસ્ટને કારણે 3 યુવતીઓ સહિત 5 લોકોના મોત થયા છે, જ્યારે 4 લોકો ઘાયલ થયા છે. ઘાયલોની હોસ્પિટલમાં સારવાર ચાલી રહી છે. આ ઘટના ગત રાત્રે 10.30 વાગ્યાની આસપાસ બની હતી.
હઝરત સાહેબ કસ્બા કાકોરીમાં રહેતા મુશીરના ઘરમાં રાત્રે સાડા દસ વાગ્યે શોર્ટ સર્કિટના કારણે બે સિલિન્ડર ફાટ્યા હતા, જેમાં કુલ 9 લોકો ઘાયલ થયા હતા. ઇજાગ્રસ્તોને સારવાર માટે ટ્રોમા સેન્ટરમાં લઇ જવામાં આવ્યા હતા. અહીં 5 લોકોના સારવાર દરમિયાન મોત થયા છે અને 4 લોકો ઘાયલ છે, જેમની સારવાર ચાલી રહી છે.
આ બ્લાસ્ટમાં 50 વર્ષીય મુશીર, 45 વર્ષની હસન બાનો, 7 વર્ષની રૈયા, 4 વર્ષની ઉમા અને 2 વર્ષની હિનાનું મોત થયું હતું. 17 વર્ષની ઈશા, 21 વર્ષની લકબ, 34 વર્ષીય અજમદ અને 18 વર્ષની અનમ ઘાયલ છે. સ્થાનિક પોલીસ દળ અને ફાયર બ્રિગેડની 3 ગાડીઓની મદદથી આગને કાબૂમાં લેવામાં આવી છે.