અમેરિકાના વિદેશ મંત્રી માર્કો રુબિયો હાલમાં રાષ્ટ્રપતિ ડોનાલ્ડ ટ્રમ્પ સાથે બેઇજિંગની મુલાકાતે છે. પરંતુ સૌથી વધુ ચર્ચા એ છે કે ચીનમાં પ્રતિબંધ હોવા છતાં રુબિયોને ત્યાં પ્રવેશ કેવી રીતે મળ્યો? મીડિયા રિપોર્ટ્સ અનુસાર, ચીનમાં એન્ટ્રી મેળવવા માટે માર્કો રુબિયોએ રાજદ્વારી માર્ગ અપનાવ્યો અને પોતાનું નામ બદલીને ‘માર્કો લુ’ રાખ્યું.
નામ બદલવાનું કારણ શું?
એએફપીના અહેવાલ મુજબ, માર્કો રુબિયો પર 2020 થી ચીનમાં પ્રતિબંધ છે. બે રાજદ્વારીઓએ પુષ્ટિ કરી છે કે પ્રતિબંધ તેમના નામના સ્પેલિંગ પર આધારિત હોવાથી, તેમની અટક ‘રુબિઓ’ રાજદ્વારી રીતે બદલીને ચીની શબ્દ ‘લુ’ કરવામાં આવી હતી અને તેણે આ નામ સાથે દેશમાં પ્રવેશ મેળવ્યો હતો.
આ અંગે સ્પષ્ટતા કરતા અમેરિકામાં ચીની દૂતાવાસના પ્રવક્તાએ કહ્યું કે દેશે તેમની મુલાકાત પર પ્રતિબંધ નથી લગાવ્યો. પ્રવક્તાના જણાવ્યા અનુસાર, ચીનના પ્રતિબંધો રુબિયો જ્યારે અમેરિકી સેનેટર હતા ત્યારે ચીન વિરુદ્ધના શબ્દો અને કાર્યો પર આધારિત છે. હાલમાં આ સમગ્ર વિવાદ પર વ્હાઇટ હાઉસ તરફથી કોઇ પ્રતિક્રિયા આવી નથી.
ચીને રૂબિયો પર શા માટે પ્રતિબંધ મૂક્યો?
માર્કો રુબિયો હંમેશા ચીનના સખત ટીકાકાર રહ્યા છે. રિપબ્લિકન સેનેટર તરીકે તેમણે ચીનની કમ્યુનિસ્ટ પાર્ટી પર ઘણા ગંભીર આરોપો લગાવ્યા હતા, જેના પછી તેમની વિરુદ્ધ આ કાર્યવાહી કરવામાં આવી હતી.
ઉઇગરોની ‘નરસંહાર’નો આરોપ: રૂબિયોએ ચીન પર ઉઇગર મુસ્લિમોના નરસંહારનો આરોપ લગાવ્યો હતો. જો કે ચીને હંમેશા આ દાવાઓને નકારી કાઢ્યા છે.
