ઉત્તર-પૂર્વ ચીનના એક ગામમાં અંતિમ સંસ્કાર દરમિયાન એક વાસ્તવિક મર્સિડીઝ બેન્ઝ કારને કબરમાં દફનાવી દેવાનો એક ચોંકાવનારો કિસ્સો સામે આવ્યો છે. આ ઘટનાનો વીડિયો વાયરલ થયા બાદ સોશિયલ મીડિયા પર અને સામાન્ય લોકોમાં કાયદાકીય ઉલ્લંઘન અને પર્યાવરણ સુરક્ષાને લઈને ભારે રોષ જોવા મળી રહ્યો છે.
શું છે ઘટના?
આ ઘટના 9 એપ્રિલે બની હતી, જ્યારે લિયાઓનિંગ પ્રાંતના લિયાઓયાંગ ગામમાં 70 વર્ષીય વ્યક્તિના અંતિમ સંસ્કાર કરવામાં આવી રહ્યા હતા. જે કાર મૃતકની કબરમાં દફનાવવામાં આવી હતી તે કાળી મર્સિડીઝ બેન્ઝ S450L હતી. આ લક્ઝરી કારની કિંમત અંદાજે 11 લાખ યુઆન (લગભગ 1.5 કરોડ રૂપિયા) હતી.
કાર પર નંબર પ્લેટ ‘8888’ હતી. ચીનમાં, 8 નંબરને સંપત્તિ અને સમૃદ્ધિનું પ્રતીક માનવામાં આવે છે. સ્થાનિક સ્તરે, ચાર સરખા અંકોવાળી આવી નંબર પ્લેટની કિંમત 250,000 યુઆન (લગભગ 37,000 યુએસ ડોલર) સુધી હોઈ શકે છે.
શા માટે વાસ્તવિક કાર કબરમાં દફનાવવામાં આવી હતી?
સ્થાનિક મીડિયાના અહેવાલો અનુસાર, મૃતક વૃદ્ધને લક્ઝરી કારનો ખૂબ જ શોખ હતો. તેથી તેમના બાળકોએ નક્કી કર્યું કે તેમના પછીના જીવનની મુસાફરી શાંતિપૂર્ણ અને સુખદ બનાવવા માટે તેમના પિતા સાથે એક વાસ્તવિક કારને દફનાવવી જોઈએ.
વાયરલ વીડિયોમાં જોઈ શકાય છે કે એક્સેવેટર (ક્રેન)ની મદદથી કારને નવી ખોદવામાં આવેલી કબરમાં ઉતારવામાં આવી રહી છે. કાર લાલ કપડાથી ઢંકાયેલી હતી અને બાજુના અરીસાઓ પર લાલ રિબન બાંધેલી હતી. ગામના ડઝનેક લોકોએ પાવડોની મદદથી કાર પર માટી નાખવામાં પરિવારને મદદ કરી.
મદદગારોને ઈનામ મળ્યા
બાદમાં પરિવારના એક પુરુષ સભ્યએ મિજબાનીનું આયોજન કર્યું અને કારને દફનાવવામાં મદદ કરનાર દરેક ગ્રામજનોને આભાર તરીકે 500 યુઆન (લગભગ US$70)નું ‘લાલ પરબિડીયું’ (શગુન) આપ્યું.
