ICC T20I રેન્કિંગમાં નંબર-1 બેટ્સમેન અભિષેક શર્માએ ન્યૂઝીલેન્ડ સામેની પ્રથમ મેચમાં ફરી એક વાર તબાહી મચાવી હતી. આ સ્ટાર ઓપનિંગ બેટ્સમેને માત્ર 35 બોલમાં 8 સ્કાયસ્ક્રેપર સિક્સર અને 5 ફોરની મદદથી 84 રનની ધમાકેદાર ઇનિંગ રમી હતી. આ તોફાની ઇનિંગ્સ માટે તેને પ્લેયર ઓફ ધ મેચનો એવોર્ડ પણ આપવામાં આવ્યો હતો. અભિષેકે પોતાની ઈનિંગ દરમિયાન ઘણા રેકોર્ડ તોડ્યા જેમાંથી એક રેકોર્ડ તેના ગુરુ યુવરાજ સિંહનો હતો. T20Iમાં ભારત માટે સૌથી વધુ સિક્સર મારનારા ખેલાડીઓનો આ રેકોર્ડ છે. યુવરાજ સિંહને પાછળ છોડીને અભિષેક શર્મા હવે આ યાદીમાં છઠ્ઠા સ્થાને પહોંચી ગયો છે.
આ 8 સિક્સર સાથે અભિષેક શર્માની T20I કરિયરમાં 81 સિક્સર છે. તમને જણાવી દઈએ કે, તેણે પોતાના T20I કરિયરમાં અત્યાર સુધી માત્ર 34 મેચ રમી છે. જો અભિષેક આ રીતે બેટિંગ કરવાનું ચાલુ રાખશે તો તે જલ્દી જ રોહિત શર્માનો રેકોર્ડ તોડીને ભારતનો સિક્સર કિંગ બની જશે.
અભિષેક શર્માની નજર હવે નાના માઈલસ્ટોન પર રહેશે. તેમનાથી આગળ કેએલ રાહુલ, હાર્દિક પંડ્યા અને વિરાટ કોહલી જેવા સિનિયર ખેલાડીઓના નામ છે, જેમના નામે આ ફોર્મેટમાં 150થી ઓછી છગ્ગા છે. અભિષેક પહેલા યાદીમાં આ ત્રણ ખેલાડીઓને પાછળ છોડવા માંગશે.
