ભારતે ચીનના નાગરિકો માટે વ્યવસાયિક મુસાફરીને સરળ બનાવવાના ઉદ્દેશ્યથી નવો ઈ-બિઝનેસ વિઝા લોન્ચ કર્યો છે. તેને ઈ-પ્રોડક્શન ઈન્વેસ્ટમેન્ટ બિઝનેસ વિઝા (eB-4 Visa) નામ આપવામાં આવ્યું છે, જે 1 જાન્યુઆરી, 2026થી અમલી બન્યું છે. આ પગલું ભારત-ચીન સંબંધોને મજબૂત કરવા અને દ્વિપક્ષીય વેપારને પ્રોત્સાહન આપવા માટે મહત્વપૂર્ણ માનવામાં આવે છે.
બેઈજિંગમાં ભારતીય દૂતાવાસની વેબસાઈટ પર જારી કરાયેલી નવીનતમ એડવાઈઝરી અનુસાર, આ વિઝા ચીનના વેપારીઓને ચોક્કસ વ્યવસાયિક પ્રવૃત્તિઓ માટે ભારતની મુસાફરી કરવાની સુવિધા આપશે. આમાં સાધનસામગ્રીની સ્થાપના અને કમિશનિંગ, ગુણવત્તાની તપાસ, જરૂરી જાળવણી, ઉત્પાદન કાર્ય, IT અને ERP રેમ્પ-અપ, તાલીમ, સપ્લાય ચેઇન ડેવલપમેન્ટ, વેન્ડર એમ્પેનલમેન્ટ, પ્લાન્ટ ડિઝાઇન અને વરિષ્ઠ મેનેજમેન્ટ મુલાકાતોનો સમાવેશ થાય છે.
એપ્લિકેશન પ્રક્રિયા અને સુવિધાઓ
ઓનલાઇન અરજી: અરજદારો https://indianvisaonline.gov.in પોર્ટલ પર ‘બ્યુરો ઓફ ઈમિગ્રેશન દ્વારા ઈ-વિઝા માટે’ ટેબ દ્વારા ઓનલાઈન અરજી કરી શકે છે. અરજી જરૂરી દસ્તાવેજો સાથે સબમિટ કરી શકાય છે. એમ્બેસી કે એજન્ટ પાસે જવાની જરૂર નથી.
ભારતીય કંપનીઓ માટે: ચીની નાગરિકોને આમંત્રિત કરતી ભારતીય કંપનીઓ DPIIT ના નેશનલ સિંગલ વિન્ડો સિસ્ટમ (NSWS) પોર્ટલ https://www.nsws.gov.in પર ‘બિઝનેસ યુઝર લોગિન’ દ્વારા નોંધણી કરાવી શકે છે.
વિઝા સમયગાળો અને માન્યતા: આ વિઝા ભારતમાં મહત્તમ છ મહિના રહેવાની મંજૂરી આપે છે. પ્રક્રિયા સમય 45-50 દિવસ આસપાસ છે.
