પાકિસ્તાન ક્રિકેટ બોર્ડ એટલે કે PCB એ ICC મહિલા ક્રિકેટ વર્લ્ડ કપ 2025માં તેના ખરાબ પ્રદર્શન માટે પાકિસ્તાન મહિલા ક્રિકેટ ટીમના મુખ્ય કોચને હટાવી દીધા છે. મહિલા વર્લ્ડ કપમાં પાકિસ્તાનની ટીમ ખાલી હાથ રહી હતી. આ પછી પીસીબીએ મુખ્ય કોચ મોહમ્મદ વસીમ સાથે સંબંધો તોડી નાખ્યા છે. તેમનો કાર્યકાળ લાંબો હતો, પરંતુ વિશ્વ કપ અભિયાન નબળું રહ્યું અને આ માટે દોષ મુખ્ય કોચ પર આવી ગયો.
પીસીબીએ સોમવારે 3 નવેમ્બરના રોજ સત્તાવાર પ્રેસ રિલીઝ દ્વારા આની પુષ્ટિ કરી અને કહ્યું કે નવા મુખ્ય કોચની શોધ શરૂ થઈ ગઈ છે. નિવેદનમાં આગળ વાંચવામાં આવ્યું, “પાકિસ્તાન ક્રિકેટ બોર્ડે પાકિસ્તાન રાષ્ટ્રીય મહિલા ક્રિકેટ ટીમના મુખ્ય કોચ તરીકે મોહમ્મદ વસીમનો કાર્યકાળ પૂર્ણ કરવાની જાહેરાત કરી છે.”
અખબારી યાદીમાં વધુમાં જણાવાયું હતું કે, “નવા મુખ્ય કોચની નિમણૂક કરવાની પ્રક્રિયા હાલમાં ચાલી રહી છે અને નવા મુખ્ય કોચ તરીકે તેમના સ્થાને કોણ આવશે? તેની જાહેરાત સમયસર કરવામાં આવશે.” પીસીબીએ મોહમ્મદ વસીમ સાથેના સંબંધો તોડી નાખ્યા છે કારણ કે પાકિસ્તાનની મહિલા ટીમ વર્લ્ડ કપમાં એક પણ જીત મેળવી શકી નથી. 8 ટીમોની ટૂર્નામેન્ટમાં પાકિસ્તાનની ટીમ સૌથી નીચલા સ્થાને હતી.
પાકિસ્તાનની ટીમે મહિલા વર્લ્ડ કપમાં સાત મેચ રમી હતી અને તેમાંથી ચારમાં હારનો સામનો કરવો પડ્યો હતો, જ્યારે ત્રણ મેચ વરસાદને કારણે રદ્દ થઈ હતી. ટીમના વહેલા બહાર નીકળ્યા બાદ, એવી અટકળો ચાલી રહી હતી કે PCB ભવિષ્યની ટુર્નામેન્ટ્સ પહેલા મહિલા ક્રિકેટ માળખાને સુધારવા માટે કોચિંગ વ્યવસ્થામાં ફેરફાર કરવા વિચારી રહી છે. તેના નિવેદનમાં પીસીબીએ હવે દેશમાં મહિલા રમતના વિકાસ માટે તેની લાંબા ગાળાની પ્રતિબદ્ધતાનો પુનરોચ્ચાર કર્યો છે.
બોર્ડે વધુમાં જણાવ્યું હતું કે, “PCB પાકિસ્તાનમાં મહિલા ક્રિકેટને મજબૂત કરવા અને આંતરરાષ્ટ્રીય સ્તરે સતત સફળતા હાંસલ કરવા માટે ટીમને શક્ય તેટલો શ્રેષ્ઠ સહયોગ મળે તે સુનિશ્ચિત કરવા માટે પ્રતિબદ્ધ છે.” નોંધનીય છે કે જૂન 2024માં આયોજિત મહિલા એશિયા કપ પહેલા મોહમ્મદ વસીમને મહિલા ટીમના મુખ્ય કોચ તરીકે નિયુક્ત કરવામાં આવ્યા હતા. તે ટૂર્નામેન્ટમાં પણ પાકિસ્તાને સારું પ્રદર્શન કર્યું ન હતું.
