રિપબ્લિકન સાંસદ લિન્ડસે ગ્રેહામે અમેરિકા અને ઈરાન વચ્ચે ચાલી રહેલી યુદ્ધવિરામ વાટાઘાટોમાં પાકિસ્તાનની મધ્યસ્થી અને તટસ્થતા પર ગંભીર સવાલ ઉઠાવ્યા છે. ઈઝરાયલ પ્રત્યે પાકિસ્તાનના “દુશ્મનભર્યા” વલણને ટાંકીને ગ્રેહામે શાંતિ પ્રક્રિયામાં ઈસ્લામાબાદની ભૂમિકાને સમસ્યારૂપ ગણાવી હતી. સાંસદનું માનવું છે કે પાકિસ્તાનના ઈરાદા યોગ્ય નથી. આ વિવાદ ત્યારે સામે આવ્યો છે જ્યારે પાકિસ્તાનના સંરક્ષણ પ્રધાન ખ્વાજા મુહમ્મદ આસિફે અમેરિકી રાષ્ટ્રપતિ ડોનાલ્ડ ટ્રમ્પના પ્રસ્તાવને ફગાવી દીધો હતો, જેમાં પાકિસ્તાનને અબ્રાહમ સમજૂતીમાં સામેલ થવાની અપીલ કરવામાં આવી હતી.
લિન્ડસે ગ્રેહામના આક્ષેપો અને ચિંતાઓ
ટ્રમ્પના નજીકના ધારાશાસ્ત્રી ગ્રેહામે આરોપ લગાવ્યો છે કે પાકિસ્તાન તેના એરબેઝ પર ઈરાની લશ્કરી વિમાનોને હોસ્ટ કરી રહ્યું છે, જે મધ્યસ્થી તરીકેની તેમની નિષ્પક્ષતા અંગે ગંભીર શંકા પેદા કરે છે. સોશિયલ મીડિયા પ્લેટફોર્મ પર એક પોસ્ટમાં
પાકિસ્તાનના સંરક્ષણ પ્રધાનના નિવેદનનો ઉલ્લેખ કરતા ગ્રેહામે કહ્યું કે ક્લિપ ભલે જૂની હોય, પરંતુ પાકિસ્તાનની ભાવનાઓ હજુ પણ એવી જ છે. તેમણે માગણી કરી કે પાકિસ્તાને ‘અબ્રાહમ એકોર્ડ’માં જોડાવાના ટ્રમ્પના આહ્વાન પર તરત જ તેનું સત્તાવાર વલણ સ્પષ્ટ કરવું જોઈએ.
પાકિસ્તાની સંરક્ષણ પ્રધાનનું વલણ
પાકિસ્તાની ન્યૂઝ ચેનલ ‘સામા ટીવી’ને આપેલા ઈન્ટરવ્યુમાં, સંરક્ષણ પ્રધાન ખ્વાજા આસિફે ડોનાલ્ડ ટ્રમ્પના દબાણ અને રાજદ્વારી પગલાંને પગલે કરારમાં જોડાવાની કોઈપણ શક્યતાને સ્પષ્ટપણે નકારી કાઢી હતી. આસિફે સ્પષ્ટતા કરી હતી કે અંગત રીતે મને નથી લાગતું કે આપણે એવી કોઈ સમજૂતીનો ભાગ બનવું જોઈએ જે આપણી મૂળભૂત વિચારધારાઓ સાથે વિરોધાભાસી હોય.
