જમ્મુ-કાશ્મીરમાં ત્યારે હોબાળો થયો જ્યારે એક ક્રિકેટર સ્થાનિક ટૂર્નામેન્ટ દરમિયાન પોતાના હેલ્મેટ પર પેલેસ્ટાઈનના ધ્વજ સાથે રમતા જોવા મળ્યો. આ ઘટનાને જોતા પોલીસ તાત્કાલિક એક્શનમાં આવી હતી અને ક્રિકેટર સહિત ટુર્નામેન્ટના આયોજકોને પૂછપરછ માટે બોલાવ્યા હતા. જમ્મુ અને કાશ્મીર પોલીસ દ્વારા જારી કરવામાં આવેલા નિવેદન અનુસાર, એક ક્રિકેટર સ્થાનિક ટૂર્નામેન્ટના ભાગ રૂપે આયોજિત મેચમાં ભાગ લેતી વખતે પેલેસ્ટાઈન ધ્વજ સાથે હેલ્મેટ પહેરીને જોવા મળ્યો હતો. પોલીસે કહ્યું, “જમ્મુમાં એક ખાનગી ટૂર્નામેન્ટમાં ક્રિકેટ મેચ દરમિયાન તેમના હેલ્મેટ પર પેલેસ્ટાઈનના ધ્વજનો ઉપયોગ કરવાના સંબંધમાં જમ્મુ અને કાશ્મીર પોલીસ દ્વારા એક ક્રિકેટ ખેલાડી અને ટુર્નામેન્ટના આયોજકને પૂછપરછ માટે બોલાવવામાં આવ્યા છે.”
પોલીસ અધિકારીઓને ટાંકીને કહેવામાં આવ્યું છે કે તપાસનો હેતુ એ જાણવાનો છે કે મેચ દરમિયાન ઝંડો કયા સંજોગોમાં બતાવવામાં આવ્યો હતો.
ક્રિકેટરની ઓળખ ફુરકાન ભટ તરીકે થઈ છે. ઈન્ડિયા ટુડે અનુસાર, આ ઘટના બુધવારે ચાલી રહેલી J&K ચેમ્પિયન્સ લીગ ક્રિકેટ ટુર્નામેન્ટમાં JK11 કિંગ્સ અને જમ્મુ ટ્રેલબ્લેઝર્સ વચ્ચેની મેચ દરમિયાન બની હતી. ભટ રમતી વખતે હેલ્મેટ પર પેલેસ્ટિનિયન ધ્વજ પહેરેલો જોવા મળ્યો હતો, ત્યારબાદ આ મામલો પોલીસના ધ્યાન પર આવ્યો હતો.
સૂત્રોએ જણાવ્યું કે આ ઘટના સંદર્ભે ટુર્નામેન્ટના આયોજકને પણ પૂછપરછ માટે બોલાવવામાં આવ્યા છે. પોલીસ એ જાણવાનો પ્રયાસ કરી રહી છે કે શું કોઈ પરવાનગી લેવામાં આવી હતી કે કેમ, ટૂર્નામેન્ટના નિયમોનું ઉલ્લંઘન થયું હતું કે કેમ અને રમતગમત દરમિયાન ધ્વજ પ્રદર્શિત કરવા પાછળનો હેતુ શું હતો.
