ગયા સપ્ટેમ્બરમાં પાકિસ્તાન સાથે વ્યૂહાત્મક રીતે મહત્વપૂર્ણ સંરક્ષણ સોદા પર હસ્તાક્ષર કર્યા બાદ હવે સાઉદી અરેબિયાએ પાકિસ્તાનને વધુ એક ભેટ આપી છે. તાજેતરમાં, પાકિસ્તાનના સંરક્ષણ દળોના વડા ફિલ્ડ માર્શલ અસીમ મુનીરને સાઉદી અરેબિયાનું સર્વોચ્ચ નાગરિક સન્માન એનાયત કરવામાં આવ્યું છે. પાકિસ્તાની સેનાએ સોમવારે કહ્યું કે મુનીરને ‘કિંગ અબ્દુલ અઝીઝ મેડલ ઑફ એક્સલન્સ’ એનાયત કરવામાં આવ્યો છે.
ઉલ્લેખનીય છે કે અસીમ મુનીર સત્તાવાર મુલાકાતે સાઉદી અરેબિયા પહોંચી ગયા છે. દરમિયાન, પાકિસ્તાની સેનાએ સોમવારે એક નિવેદનમાં જણાવ્યું હતું કે, “‘ખાદિમ-અલ-હરમાન-ઉલ-શરીફાન’ કિંગ સલમાન બિન અબ્દુલ અઝીઝ અલ સઉદ દ્વારા જારી કરાયેલા શાહી આદેશ હેઠળ, ફિલ્ડ માર્શલને સાઉદી અરેબિયાનું સર્વોચ્ચ રાષ્ટ્રીય નાગરિક સન્માન ‘કિંગ અબ્દુલ અઝીઝ મેડલ ઑફ એક્સલન્સ ક્લાસ’ એનાયત કરવામાં આવ્યો છે.”
નિવેદનમાં વધુમાં કહેવામાં આવ્યું છે કે સાઉદી નેતૃત્વએ ફિલ્ડ માર્શલ અસીમ મુનીરની વ્યાવસાયિક નિપુણતા અને વ્યૂહાત્મક દ્રષ્ટિની પ્રશંસા કરી અને બંને દેશો વચ્ચે વર્ષો જૂના ભાઈચારાને વધુ મજબૂત બનાવવાની તેમની પ્રતિબદ્ધતા પર ભાર મૂક્યો. મુનીરે આ સન્માન માટે ખાદિમ-અલ-હરમાન-ઉલ-શરીફાઈન અને સાઉદી નેતૃત્વનો આભાર વ્યક્ત કર્યો છે અને તેને પાકિસ્તાન અને સાઉદી અરેબિયા વચ્ચેના અતૂટ સંબંધોનું પ્રતીક ગણાવ્યું છે. તેમણે સાઉદી અરેબિયાની સુરક્ષા, સ્થિરતા અને સમૃદ્ધિ માટે પાકિસ્તાનની પ્રતિબદ્ધતાનો પણ પુનરોચ્ચાર કર્યો હતો.
મુનીર પર ટ્રમ્પનું દબાણ
આ પહેલા અસીમ મુનીર સાઉદી અરેબિયાની સત્તાવાર મુલાકાત દરમિયાન રક્ષા મંત્રી પ્રિન્સ ખાલિદ બિન સલમાન બિન અબ્દુલ અઝીઝ અલ સાઉદને પણ મળ્યા હતા. બેઠક દરમિયાન, બંને પક્ષોએ પ્રાદેશિક સુરક્ષા, લશ્કરી સહયોગ, વ્યૂહાત્મક સહયોગ અને ઉભરતા ભૌગોલિક રાજકીય પડકારો સહિત પરસ્પર હિતના મુદ્દાઓ પર ચર્ચા કરી હતી. મળતી માહિતી મુજબ મુનીરની મુલાકાતનો હેતુ ટ્રમ્પની ગાઝા માટે પ્રસ્તાવિત યોજના પર ચર્ચા કરવાનો પણ છે.
