કોલકાતાના ઈડન ગાર્ડન્સ ખાતે 14 નવેમ્બરથી ભારત અને દક્ષિણ આફ્રિકા વચ્ચે શરૂ થઈ રહેલી પ્રથમ ટેસ્ટ પહેલા ભારતીય કેપ્ટન શુભમન ગીલે સતત ક્રિકેટ રમવાથી ઉદ્ભવતા વર્કલોડ મેનેજમેન્ટના મુદ્દે ખુલીને કહ્યું છે. શુભમન ગિલે કહ્યું કે તે હજુ પણ એ સમજવાનો પ્રયાસ કરી રહ્યો છે કે ત્રણેય ફોર્મેટમાં એક ખેલાડી તરીકે તેના વર્કલોડને કેવી રીતે મેનેજ કરવું. ગિલ ભારતની ટેસ્ટ અને ODI ટીમના કેપ્ટન છે, જ્યારે તાજેતરમાં જ તેને T20 ટીમના વાઇસ કેપ્ટન તરીકે નિયુક્ત કરવામાં આવ્યા હતા.
ભારતીય કેપ્ટન શુભમન ગિલે કહ્યું, “હું હજુ પણ મારા વર્કલોડને કેવી રીતે મેનેજ કરવું તે સમજવાનો પ્રયાસ કરી રહ્યો છું. અમે સતત રમી રહ્યા છીએ અને વિવિધ દેશોમાં પ્રવાસ કરી રહ્યા છીએ. અમને એક ફોર્મેટમાંથી બીજા ફોર્મેટમાં રમવા માટે ઓછો સમય પણ મળી રહ્યો છે.
ગિલે કહ્યું, “તેથી હું એ જાણવાનો પણ પ્રયાસ કરી રહ્યો છું કે મારા માટે સારું પ્રદર્શન કરવાનો અને તમામ ફોર્મેટમાં સફળ થવાનો શ્રેષ્ઠ માર્ગ કયો છે પરંતુ પડકાર ચોક્કસપણે શારીરિક કરતાં માનસિક છે.” ગિલે એમ પણ કહ્યું હતું કે વિશ્વ ટેસ્ટ ચેમ્પિયનશિપની વર્તમાન ચેમ્પિયન દક્ષિણ આફ્રિકા તેની ટીમ સામે સખત પડકાર રજૂ કરશે.
તેણે કહ્યું, “અમે જાણીએ છીએ કે વર્તમાન WTC ચેમ્પિયન સામેની સ્પર્ધા સરળ નહીં હોય. કેટલીક મુશ્કેલ ક્ષણો હશે. પરંતુ અમે તેનો સારી રીતે સામનો કર્યો છે. WTC ફાઈનલની રેસમાં અમારી સ્થિતિને મજબૂત કરવા માટે આ બંને ટેસ્ટ મેચ મહત્વપૂર્ણ છે.
