ભારતીય T20 કેપ્ટન સૂર્યકુમાર યાદવ ન્યૂઝીલેન્ડ સામેની પ્રથમ T20માં સારી સ્થિતિમાં જોવા મળ્યો હતો. તેણે 22 બોલમાં 32 રનની ઇનિંગ રમી હતી, જેમાં તેણે 4 ચોગ્ગા અને 1 છગ્ગા ફટકાર્યા હતા. સૂર્યા આ શરૃઆતને મોટી ઇનિંગમાં બદલી શક્યો ન હતો, પરંતુ ટી20 વર્લ્ડ કપ પહેલા કેપ્ટનને ફોર્મમાં પરત ફરતો જોઈને ભારતીય ચાહકો ખૂબ જ ખુશ છે. સૂર્યકુમાર યાદવે નાગપુરમાં આયોજિત પ્રથમ T20 દરમિયાન પાકિસ્તાનના પૂર્વ કેપ્ટન બાબર આઝમનો વર્લ્ડ રેકોર્ડ પણ તોડ્યો હતો. સૂર્યાએ કોઈ રન બનાવ્યા વિના મેદાનમાં પ્રવેશતાની સાથે જ આ ઈતિહાસ રચી દીધો હતો.
સૌથી ઓછા દિવસોમાં 100 T20 મેચ રમવાનો આ રેકોર્ડ છે. સૂર્યકુમાર યાદવે ન્યૂઝીલેન્ડ સામેની પ્રથમ T20Iમાં તેની 100મી T20I રમી હતી. તેણે મેદાનમાં ઉતરતાની સાથે જ બાબર આઝમનો વર્લ્ડ રેકોર્ડ તોડી નાખ્યો હતો.
બાબર આઝમે તેની 100મી આંતરરાષ્ટ્રીય મેચ રમવા માટે તેના ડેબ્યુથી 2410 દિવસનો સમય લીધો હતો, જે લગભગ 7 વર્ષ થાય છે.
જ્યારે 14 માર્ચ 2021ના રોજ T20 ક્રિકેટમાં ડેબ્યૂ કરનાર સૂર્યકુમાર યાદવે 1774 દિવસમાં આ માઈલસ્ટોન હાંસલ કર્યો હતો. સૂર્યકુમાર યાદવ હવે T20માં સૌથી ઓછા દિવસોમાં 100 આંતરરાષ્ટ્રીય મેચ રમનાર ખેલાડી બની ગયો છે.
