વડાપ્રધાન નરેન્દ્ર મોદી પોતાના પાંચ દેશોના પ્રવાસના અંતિમ ચરણમાં ઈટાલીની રાજધાની રોમ પહોંચી ગયા છે. આ પ્રવાસ પર મહત્વપૂર્ણ રાજદ્વારી ચર્ચાઓ વચ્ચે એક ખૂબ જ રસપ્રદ અને રમુજી ઘટના પ્રકાશમાં આવી છે. વડાપ્રધાન મોદીએ ઈટાલીના વડાપ્રધાન જ્યોર્જિયા મેલોનીને ‘પાર્લે મેલોડી’ ચોકલેટનું પેકેટ ભેટમાં આપ્યું છે, જેનો વીડિયો ઈન્ટરનેટ પર વાયરલ થઈ રહ્યો છે. આ વીડિયોને ખુદ વડાપ્રધાન જ્યોર્જિયા મેલોનીએ પોતાના એક્સ હેન્ડલ પર શેર કર્યો છે. આ વીડિયો હવે સોશિયલ મીડિયા પર ઝડપથી વાયરલ થઈ રહ્યો છે.
શું છે વાયરલ વીડિયોમાં?
આ સેલ્ફી વીડિયોમાં પીએમ મેલોની અને પીએમ મોદી સાથે જોવા મળી રહ્યા છે. વીડિયોમાં ઈટાલીના વડાપ્રધાન મેલોની હસતા હસતા કહે છે, “વડાપ્રધાન મોદી મારા માટે ખૂબ જ સરસ ટોફી ગિફ્ટ લાવ્યા છે.” આ પછી તરત જ પીએમ મોદી કેમેરાની સામે ‘મેલોડી’ ચોકલેટનું પેકેટ બતાવે છે અને કહે છે – “મેલડી!” આ પછી બંને નેતાઓ હસવા લાગ્યા. આ રમુજી ક્ષણ બંને નેતાઓ વચ્ચેની ગાઢ મિત્રતા અને શાનદાર કેમિસ્ટ્રી દર્શાવે છે.
‘મેલડી’ નો અર્થ શું છે?
ઇન્ટરનેટ અને સોશિયલ મીડિયાની દુનિયામાં, ‘મેલોડી’ શબ્દ ખરેખર ઇટાલીના પીએમ જ્યોર્જિયા મેલોની અને ભારતના પીએમ નરેન્દ્ર મોદીની અટકને જોડીને બનાવવામાં આવ્યો છે: મેલોની + મોદી = મેલોડી.
પાછલા વર્ષોમાં જ્યારે બંને નેતાઓ મળ્યા ત્યારે આ શબ્દ પ્રથમ ટ્રેન્ડમાં આવ્યો હતો. તે દરમિયાન પીએમ મેલોનીએ પોતે એક સેલ્ફી વિડિયો પોસ્ટ કર્યો હતો જેમાં લખ્યું હતું કે, “મેલોડી ટીમ તરફથી હેલો”. સોશિયલ મીડિયા યુઝર્સે બંને વચ્ચેની આ રાજદ્વારી મિત્રતાને ‘મેલડી’ નામ આપ્યું હતું. હવે પીએમ મોદીએ આ વૈશ્વિક સોશિયલ મીડિયા ટ્રેન્ડને ખૂબ જ શાનદાર અને વિનોદી રીતે જવાબ આપ્યો છે અને તેમને વાસ્તવિક ‘મેલોડી’ ટોફી ભેટમાં આપી છે.
