યુએસ સેક્રેટરી ઓફ સ્ટેટ માર્કો રુબિયોએ શુક્રવારે જણાવ્યું હતું કે, અમેરિકા તેની ઓફર માટે પાકિસ્તાનનો ખૂબ આભારી છે જેમાં ઈસ્લામાબાદે ગાઝામાં પ્રસ્તાવિત ઈન્ટરનેશનલ સ્ટેબિલાઈઝેશન ફોર્સ (આઈએસએફ)માં જોડાવાની અથવા ઓછામાં ઓછી વિચારણા કરવાની ઈચ્છા વ્યક્ત કરી છે. જો કે, તેમણે ભારપૂર્વક જણાવ્યું હતું કે અત્યાર સુધી કોઈપણ દેશ પાસેથી કોઈ ઔપચારિક સંમતિ માંગવામાં આવી નથી અથવા પ્રાપ્ત થઈ નથી.
સ્ટેટ ડિપાર્ટમેન્ટમાં આયોજિત એક દુર્લભ અને લાંબી વર્ષ-અંતની પ્રેસ કોન્ફરન્સ દરમિયાન, રુબિયોને જ્યારે પૂછવામાં આવ્યું કે શું ગાઝામાં પીસકીપિંગ સૈનિકો મોકલવા માટે યુએસને પાકિસ્તાનની સંમતિ મળી છે, ત્યારે કહ્યું: “અમે પાકિસ્તાનના આભારી છીએ કે તેણે તેનો ભાગ બનવાની ઓફર કરી છે અથવા ઓછામાં ઓછું તેના પર વિચાર કરવાની ઓફર કરી છે.”
રૂબિયોએ એ પણ સ્પષ્ટ કર્યું કે અમેરિકાને વિશ્વાસ છે કે આ મિશનમાં અન્ય દેશોની ભાગીદારી પણ સુનિશ્ચિત કરી શકાય છે. તેમણે કહ્યું- અમારી પાસે ઘણા એવા દેશો છે જે આ સંઘર્ષના તમામ પક્ષોને સ્વીકાર્ય છે અને જે આ દળનો ભાગ બનવા માટે આગળ આવવા તૈયાર છે.
ટ્રમ્પ વહીવટીતંત્રના પ્રયાસો અને પડકારો
રુબિયોની ટિપ્પણીઓ ત્યારે આવી છે જ્યારે ટ્રમ્પ વહીવટીતંત્ર ઇઝરાયેલ-હમાસ યુદ્ધને સમાપ્ત કરવા માટે તેની શાંતિ યોજનાને અનુસરવામાં ગંભીર રાજકીય અને રાજદ્વારી પડકારોનો સામનો કરી રહ્યું છે. સમાચાર એજન્સી એપીના જણાવ્યા અનુસાર, રુબિયોએ આ પ્રેસ કોન્ફરન્સમાં આ અવરોધો વિશે ખુલીને વાત કરી.
દરમિયાન, રોઇટર્સના અહેવાલમાં જણાવાયું છે કે પાકિસ્તાન આર્મી ચીફ અસીમ મુનીર માટે આ પ્રારંભિક અને મહત્વપૂર્ણ પરીક્ષણ છે, કારણ કે વોશિંગ્ટન પાકિસ્તાન પર પ્રસ્તાવિત ગાઝા મિશનમાં સૈનિકોનું યોગદાન આપવા દબાણ કરી રહ્યું છે. રિપોર્ટ અનુસાર મુનીર આગામી સપ્તાહમાં વોશિંગ્ટન જઈ શકે છે અને આ દરમિયાન તેની ટ્રમ્પ સાથે સંભવિત મુલાકાત થઈ શકે છે. છેલ્લા છ મહિનામાં ટ્રમ્પ સાથે આ તેમની ત્રીજી મુલાકાત હશે.
