બાંગ્લાદેશમાં 2024ની લોકશાહી તરફી ચળવળના અગ્રણી યુવા નેતા શરીફ ઉસ્માન હાદીના મૃત્યુ બાદ દેશભરમાં ભારે અશાંતિ ફેલાઈ છે. ગુરુવારે રાતથી શુક્રવારની વહેલી સવાર સુધી રાજધાની ઢાકા સહિત અનેક શહેરોમાં હજારો લોકો રસ્તા પર ઉતરી આવ્યા હતા અને હાદી માટે ન્યાયની માંગણી સાથે હિંસક પ્રદર્શનો કર્યા હતા. 32 વર્ષીય શરીફ ઉસ્માન હાદીનું ગુરુવારે સિંગાપુરની હોસ્પિટલમાં અવસાન થયું હતું. ગયા અઠવાડિયે ઢાકામાં ગોળીથી તે ગંભીર રીતે ઘાયલ થયો હતો. તેને સારવાર માટે સિંગાપોર લઈ જવામાં આવ્યો, જ્યાં તેનું મોત નીપજ્યું.
દેખાવો ધીરે ધીરે હિંસક બનતા ગયા. દક્ષિણ-પશ્ચિમ શહેર રાજશાહીમાં દેખાવકારોએ ભારતીય રાજદ્વારી કચેરી તરફ કૂચ કરવાનો પ્રયાસ કર્યો, પરંતુ પોલીસે તેમને અટકાવ્યા. સોશિયલ મીડિયા પર વાયરલ વીડિયોમાં ભારતીય આસિસ્ટન્ટ હાઈ કમિશન પાસે પથ્થરમારાના દ્રશ્યો પણ જોવા મળ્યા છે. ઢાકામાં પણ બુધવારે સેંકડો દેખાવકારોએ ભારતના ડેપ્યુટી હાઈ કમિશનરના નિવાસસ્થાન સહિત ભારતીય રાજદ્વારી સંકુલની બહાર એકઠા થવાનો પ્રયાસ કર્યો હતો, ત્યારબાદ પોલીસે ભીડને વિખેરવા માટે ટીયર ગેસનો આશરો લેવો પડ્યો હતો.
ભારત વિરોધી સૂત્રોચ્ચાર પણ કરવામાં આવ્યા હતા
બાંગ્લાદેશમાં નેશનલ સિટીઝન પાર્ટી (એનસીપી) એ સ્ટુડન્ટ્સ અગેન્સ્ટ ડિસ્ક્રિમિનેશન (એસએડી) સાથે સંકળાયેલું એક મોટું સંગઠન છે. તેના કાર્યકરોએ પણ પ્રદર્શનમાં ભાગ લીધો હતો. તેઓએ ભારત વિરોધી નારા લગાવ્યા અને આરોપ લગાવ્યો કે હાદી પર હુમલો કરનાર આરોપી ભારત ભાગી ગયો છે. NCP નેતા સરજીસ આલમે કહ્યું, “ભારત જ્યાં સુધી હાદીભાઈના હત્યારાઓને પરત ન કરે ત્યાં સુધી બાંગ્લાદેશમાં ભારતીય હાઈ કમિશન બંધ રહેવું જોઈએ. હવે કે ક્યારેય નહીં, અમે યુદ્ધમાં છીએ.”
મીડિયા સંસ્થાઓ પર હુમલા
હિંસા દરમિયાન રાજધાની ઢાકામાં અનેક ઈમારતોને આગ ચાંપવામાં આવી હતી. દેશના બે અગ્રણી અખબારો, પ્રથમ આલો અને ડેઈલી સ્ટારની ઓફિસને નિશાન બનાવવામાં આવી હતી. ફાયર વિભાગે ઓછામાં ઓછી ત્રણ આગની ઘટનાઓની પુષ્ટિ કરી છે, જેમાં ઘણા પત્રકારો અને કર્મચારીઓ ઇમારતોમાં ફસાયા છે. એક પ્રત્યક્ષદર્શીના જણાવ્યા અનુસાર, “રાત્રે લગભગ 11 વાગ્યે, સેંકડો પ્રદર્શનકારીઓ પ્રથમ આલોની ઓફિસમાં પહોંચ્યા અને બાદમાં ડેઈલી સ્ટાર બિલ્ડિંગને આગ લગાવી દીધી.”
ઢાકાની બહાર પણ સ્થિતિ વણસી હતી. રાજશાહીમાં અવામી લીગની ઓફિસ સળગાવી દેવામાં આવી હતી, જ્યારે ભૂતપૂર્વ વડા પ્રધાન શેખ હસીનાની સંપત્તિમાં તોડફોડ કરવામાં આવી હતી. ઉલ્લેખનીય છે કે ગયા વર્ષના જનઆંદોલન બાદ શેખ હસીના ભારત ગયા હતા. દેખાવકારોએ ઢાકા-મૈમનસિંહ હાઈવે પણ બ્લોક કરી દીધો હતો અને ચિટાગોંગમાં ભૂતપૂર્વ મંત્રીના નિવાસસ્થાન પર હુમલો કરવામાં આવ્યો હતો.
હાદીની હત્યાથી લોકોમાં રોષ ફેલાયો હતો
હાદી વિદ્યાર્થી સંગઠન ‘ઇન્કલાબ મંચ’ના વરિષ્ઠ નેતા હતા અને તેમને શેખ હસીના સરકારના સ્વર ટીકાકાર માનવામાં આવતા હતા. 12 ડિસેમ્બરે, ઢાકામાં એક મસ્જિદમાંથી બહાર નીકળતી વખતે માસ્ક પહેરેલા હુમલાખોરોએ તેને ગોળી મારી હતી. બાંગ્લાદેશની વચગાળાની સરકારના વડા મોહમ્મદ યુનુસે હાદીના મૃત્યુને દેશ માટે અપુરતી ખોટ ગણાવી હતી. રાષ્ટ્રીય શોકનો દિવસ જાહેર કર્યો અને દેશભરમાં વિશેષ પ્રાર્થનાનો આદેશ આપ્યો.
