ભારતીય ટીમે આગામી T20 વર્લ્ડ કપ પહેલા પ્રેક્ટિસ મેચમાં દક્ષિણ આફ્રિકાને 30 રને હરાવીને ટૂર્નામેન્ટ માટે પોતાને પ્રબળ દાવેદાર જાહેર કરી છે. ન્યુઝીલેન્ડ બાદ ભારતીય ટીમે દક્ષિણ આફ્રિકા સામે પણ ચોગ્ગા અને છગ્ગા ફટકાર્યા હતા. પ્રથમ બેટિંગ કરતા ભારતે 20 ઓવરમાં 6 વિકેટ ગુમાવીને 240 રન બનાવ્યા હતા. ભારતીય ઇનિંગ્સ દરમિયાન બે ખેલાડીઓ નિવૃત્ત થયા હતા. આ દરમિયાન મેચ જીત્યા બાદ ભારતીય ટીમના ડ્રેસિંગ રૂમનો એક વીડિયો સામે આવ્યો છે, જેમાં અર્શદીપ સિંહ, ઈશાન કિશન, તિલક વર્મા અને અક્ષર પટેલ વાત કરતા જોવા મળી રહ્યા છે. જો કે આ દરમિયાન તિલક વર્માએ અર્શદીપના વીડિયો બનાવવાનો સખત વિરોધ કર્યો હતો.
અર્શદીપ સિંહ ભારતીય ડ્રેસિંગ રૂમમાં પોતાના ફોનથી વીડિયો રેકોર્ડિંગ કરી રહ્યો હતો. આ દરમિયાન તેણે કહ્યું, “અમે તેને જેટલું જોઈ શકાય એટલું જોયું અને આ બે આંખોથી કેટલું જોઈ શકાય.” ઈશાન કિશન તેની કવિતા જોઈને હસી રહ્યો હતો. તે તિલક વર્માને પોતાનું ગીત પણ સંભળાવવા માંગતો હતો પરંતુ તેણે રસ દાખવ્યો ન હતો અને કહ્યું હતું કે, “પરમિશન વિના વીડિયો બનાવશો નહીં, હું તેનો પ્રચાર કરતો નથી.” આ દરમિયાન તિલક થોડા ગુસ્સામાં દેખાતા હતા. જો કે આવી રમૂજ તે બધામાં સામાન્ય છે.
તિલક વર્મા લાંબા સમય બાદ ભારતીય ટીમમાં વાપસી કરી રહ્યા છે. સાઉથ આફ્રિકા સામેની પ્રેક્ટિસ મેચમાં ઈજા બાદ પરત ફરી રહેલા વર્મા શાનદાર ફોર્મમાં જોવા મળી રહ્યા હતા. તેણે સ્પિનર જ્યોર્જ લિન્ડેના બોલ પર એક સિક્સર અને એક ફોર સાથે શરૂઆત કરી અને પછી નોર્કિયા પર સતત બે ચોગ્ગા ફટકાર્યા. તિલકને માર્કો જેન્સને બોલ્ડ કર્યો હતો. 19 બોલનો સામનો કરીને તેણે ત્રણ સિક્સર અને ત્રણ ફોર ફટકારી અને 45 રનની જોરદાર ઇનિંગ રમી. તિલકના શોટ્સને જોઈને લાગતું હતું કે તે તેના જૂના ફોર્મમાં છે, ઈજાની તેના ફોર્મ પર કોઈ અસર થઈ નથી.
ઇશાન કિશનના નેતૃત્વમાં બેટ્સમેનોના શાનદાર પ્રદર્શનને કારણે ભારતે બુધવારે ICC T20 વર્લ્ડ કપની પ્રેક્ટિસ મેચમાં દક્ષિણ આફ્રિકાને 30 રને હરાવ્યું હતું. ભારતના 241 રનના મોટા ટાર્ગેટનો પીછો કરતા સાઉથ આફ્રિકા ટ્રીસ્ટન સ્ટબ્સ (45 અણનમ), રેયાન રિકલ્ટન (44), એડન માર્કરામ (38), જેસન સ્મિથ (35) અને માર્કો યાનસેન (31)ની ઇનિંગ્સ છતાં સાત વિકેટે 210 રન જ બનાવી શક્યું હતું.
