યુક્રેને એક જ રાતમાં રશિયાના વિવિધ વિસ્તારો પર 1000થી વધુ ડ્રોન છોડ્યા છે. આમાંથી સેંકડો ડ્રોન મોસ્કો તરફ મોકલવામાં આવ્યા હતા. મોસ્કોના મેયર સર્ગેઈ સોબ્યાનિને તેને રાજધાની પર અત્યાર સુધીનો સૌથી મોટો ડ્રોન હુમલો ગણાવ્યો છે. હુમલામાં મોસ્કોની ઓઈલ રિફાઈનરી અને રહેણાંક મકાનને નુકસાન પહોંચ્યું છે. મોસ્કો પ્રદેશના ગવર્નર આંદ્રે વોરોબ્યોવના જણાવ્યા અનુસાર, હુમલામાં બે લોકોના મોત થયા છે અને 20 લોકો ઘાયલ થયા છે. મૃતકોમાં 74 વર્ષીય પુરુષ અને 44 વર્ષીય મહિલાનો સમાવેશ થાય છે. આ હુમલો એવા સમયે થયો છે જ્યારે રશિયામાં સંસદીય ચૂંટણીનો ત્રીજો અને અંતિમ દિવસ ચાલી રહ્યો છે.
રશિયાના સંરક્ષણ મંત્રાલયે દાવો કર્યો છે કે તેના હવાઈ સંરક્ષણ એકમોએ સમગ્ર દેશમાં 1,100 યુક્રેનિયન ડ્રોનને તોડી પાડ્યા છે. સોબ્યાનિને જણાવ્યું હતું કે મોસ્કો તરફ જઈ રહેલા 450 ડ્રોનનો નાશ કરવામાં આવ્યો હતો. તેમના કહેવા પ્રમાણે, કેટલાક ડ્રોન મોસ્કોની ઓઈલ રિફાઈનરી સુધી પહોંચ્યા હતા, જ્યારે એક ડ્રોને રહેણાંક મકાનને નુકસાન પહોંચાડ્યું હતું. તેમણે આ હુમલાને અભૂતપૂર્વ ગણાવ્યો હતો અને આક્ષેપ કર્યો હતો કે તેનો હેતુ ચૂંટણીમાં વિક્ષેપ પાડવાનો હતો. સોબ્યાનિને કહ્યું કે યુક્રેન આ પ્રયાસમાં સફળ નથી થયું. મોસ્કોમાં વિસ્ફોટના અવાજો અને રિફાઈનરી નજીક ધુમાડો નીકળતો હોવાના અહેવાલો પણ મળ્યા હતા.
વિવિધ પ્રકારની મિસાઇલો અને ડ્રોનનો ઉપયોગ
યુક્રેનના રાષ્ટ્રપતિ વોલોડીમિર ઝેલેન્સકીએ સોશિયલ મીડિયા પર કહ્યું કે હુમલામાં વિવિધ પ્રકારની મિસાઈલ અને ડ્રોનનો ઉપયોગ કરવામાં આવ્યો હતો. જેમાં યુક્રેનમાં બનેલી ફ્લેમિંગો અને પેલિકન મિસાઈલોનો સમાવેશ થાય છે. ઝેલેન્સકીના જણાવ્યા અનુસાર, હુમલાનું લક્ષ્ય રશિયાની તેલ અને લોજિસ્ટિક્સ સુવિધાઓ હતી. તેમણે કહ્યું કે આવા ટાર્ગેટને નિશાન બનાવવાથી રશિયાની વોર મશીન ચલાવતી અર્થવ્યવસ્થા પર દબાણ વધે છે. રશિયા અને યુક્રેન લાંબા સમયથી એકબીજાની ઉર્જા અને લશ્કરી માળખા પર લાંબા અંતરના ડ્રોન અને મિસાઈલ હુમલામાં સામેલ છે.
