રાજકોટ ગ્રામ્ય પીજીવીસીએલ દ્વારા નાઇટ ક્રિકેટ ટુર્નામેન્ટ દરમિયાન મોટી સંખ્યામાં વીંછીયા ગામોમાં વીજ લાઇનો લંગર નાખીને વીજ ચોરી કરતા ઝડપાઇ જતાં ફફડાટ મચી ગયો હતો. રાજકોટ જિલ્લાના શહેરી અને ગ્રામ્ય વિસ્તારોમાં છેલ્લા ઘણા સમયથી વીજ ચોરોએ માથું ઉંચક્યું છે ત્યારે પીજીવીસીએલ દ્વારા સતત વીજ ચેકીંગ દરોડા પાડવામાં આવી રહ્યા છે.
તાજેતરમાં જસદણ, ગોંડલ અને રાજકોટ તાલુકાના ગ્રામ્ય વિસ્તારોમાંથી એક સપ્તાહના ટૂંકા ગાળામાં અંદાજે 02 કરોડના વીજ ચોરીના બીલ બહાર પાડવામાં આવ્યા હતા. હજુ પણ પ્રક્રિયા ચાલુ છે અને તારીખ 12-05-2023 ના રોજ સચોટ માહિતીના આધારે રાજકોટ ગ્રામ્ય વર્તુળ કચેરીએ વિંછીયા ગામમાં નાઇટ ક્રિકેટ ટુર્નામેન્ટ માટેના પાવર ટ્રાન્સફોર્મરમાંથી સીધી જ વીજ ચોરી પકડી પાડી છે. જેમાં અંદાજે 22 લાખની વીજચોરીનો અંદાજ હોવાનું પ્રાથમિક કક્ષાએ જાણવા મળ્યું છે.
નોંધપાત્ર બાબત એ છે કે વીજળીની સતત વધતી જતી માંગને પહોંચી વળવા એક તરફ તંત્ર એડીચોટીનું જોર લગાવી રહ્યું છે તો બીજી તરફ વીજ ચોરી માટે જવાબદાર વીજ ચોરો પર દંડ ફટકારીને અન્ય ગ્રાહકોને જાગૃત કરવાનું કામ કરી રહ્યું છે. રાજકોટ ગ્રામ્ય વર્તુળ કચેરીના અધિક્ષક ઈજનેરનાં માર્ગદર્શન હેઠળ પીજીવીસીએલની મુખ્ય કચેરી, સબ એન્જીનીયર અને જુનિયર ઈજનેરોની ટીમોએ ઉપરોક્ત કામો પૂર્ણ કરવામાં સફળતા મેળવી હતી.
આ રીતે વીજ તંત્ર દ્વારા ગ્રાહકોને વારંવાર સૂચનો અને મીટીંગો દ્વારા જાગૃત કરવામાં આવી રહ્યા છે અને આજના સ્પર્ધાત્મક જીવનના તબક્કામાં વીજ ચોરો વિશે અંગત માહિતી આપી વીજ તંત્રને અને પોતાને મદદ કરવા નમ્ર અપીલ કરવામાં આવી રહી છે.