સ્પોર્ટ્સ ડેસ્ક. દુબઈ
દુબઈ ઈન્ટરનેશનલ સ્ટેડિયમમાં શનિવારે રમાયેલી મહિલા એશિયા કપ 2026ની 9મી મેચમાં પાકિસ્તાનને ભારત સામે 7 વિકેટે કારમી હારનો સામનો કરવો પડ્યો હતો. હાર બાદ પાકિસ્તાની કેપ્ટન ફાતિમા સનાએ સ્વીકાર્યું કે તેની ટીમની બેટિંગ નબળી હતી અને ટીમ આખી ઇનિંગ્સ દરમિયાન સંઘર્ષ કરતી રહી.
પાકિસ્તાની કેપ્ટન ફાતિમા સનાએ ટોસ જીતીને પ્રથમ બેટિંગ કરવાનો નિર્ણય લીધો હતો, પરંતુ આ નિર્ણય ટીમ માટે મોંઘો સાબિત થયો હતો અને પાકિસ્તાની ટીમ 18.1 ઓવરમાં માત્ર 55 રનમાં જ સમેટાઈ ગઈ હતી. સ્થિતિ એવી હતી કે પાકિસ્તાનના માત્ર બે બેટ્સમેન ડબલ ફિગરને સ્પર્શી શક્યા હતા. ચાર ખેલાડીઓ પોતાનું ખાતું પણ ખોલાવી શક્યા ન હતા.
પહેલા બેટિંગ કરવાના નિર્ણય પર પાકિસ્તાની કેપ્ટને કહ્યું કે, અમારી બેટિંગ ખોરવાઈ ગઈ, અમે આખી ઈનિંગ દરમિયાન સંઘર્ષ કર્યો. અમે જાણતા હતા કે વિકેટ તાજી છે અને અમે શક્ય તેટલા વધુ રન બનાવવા માંગતા હતા. અમને વિશ્વાસ હતો કે અમારું બોલિંગ યુનિટ સારું છે. આસાન ટાર્ગેટનો પીછો કરી રહેલી ભારતીય ટીમે 29ના સ્કોર સુધી પોતાની 3 વિકેટ ગુમાવી દીધી હતી. જો કે આ પછી ટીમે 8.4 ઓવરમાં 7 વિકેટે મેચ જીતી લીધી હતી. પાકિસ્તાન તરફથી ફાતિમા સના (3 ઓવરમાં 17 રન આપીને 3 વિકેટ) એ ત્રણેય વિકેટ ઝડપી હતી.
કેપ્ટન સના વ્યક્તિગત સિદ્ધિ કરતાં ટીમની જીતને વધુ પસંદ કરે છે. તેણે કહ્યું, મેં ત્રણ વિકેટ લીધી, પરંતુ તેમ છતાં અમે મેચ હારી ગયા, તેથી કોઈ ફરક પડતો નથી. અમારે જીતવું જરૂરી હતું, તેથી ત્રણ વિકેટ લેવાથી કોઈ ફરક પડતો નથી. 2માંથી 1 મેચ હારવા છતાં, પાકિસ્તાની ટીમ ગ્રુપ A ના પોઈન્ટ ટેબલમાં બીજા સ્થાને છે. હવે પાકિસ્તાની ટીમ 7 સપ્ટેમ્બરે તેની અંતિમ ગ્રુપ મેચમાં હોંગકોંગ, ચીન સામે ટકરાશે.
ભારત પહેલા જ ગ્રુપ-એમાંથી સેમીફાઈનલમાં જગ્યા બનાવી ચૂક્યું છે. હવે પાકિસ્તાન (-0.569), થાઈલેન્ડ (-2.050) અને હોંગકોંગ, ચીન (-3.575) અનુક્રમે બીજા, ત્રીજા અને ચોથા સ્થાને છે. એટલે કે આગામી મેચ પાકિસ્તાન માટે નિર્ણાયક બની રહેશે. આ મેચને લઈને પાકિસ્તાની કેપ્ટને કહ્યું કે, અમે ત્યાં સારું ક્રિકેટ રમવાનો પ્રયત્ન કરીશું અને છેલ્લી મેચમાં અમે જીતીને ફાઇનલમાં (નોકઆઉટ) જવાનો પ્રયાસ કરીશું. -IANS
આ પણ વાંચો – અખબાર પહેલા તમારા રાજ્ય/શહેરના સમાચાર વાંચવા માટે ક્લિક કરો.
