અમેરિકાના ઓરેગોન રાજ્યના બેન્ડ શહેરમાં ગુરુવારે એક પ્રાથમિક શાળામાં ગોળીબારની ઘટનામાં ત્રણ બાળકો અને એક શિક્ષકના મોત થયા છે. પોલીસના જણાવ્યા અનુસાર મૃતક બાળકોની ઉંમર 5, 8 અને 11 વર્ષની હતી. ઘટના બાદ ઘટનાસ્થળે પહોંચેલા પોલીસ અધિકારીઓને 16 વર્ષીય હુમલાખોર પણ શાળાની અંદર મૃત હાલતમાં જોવા મળ્યો હતો.
બેન્ડ પોલીસ ચીફ માઈક ક્રાન્ત્ઝે કહ્યું કે એક સ્થાનિક વ્યક્તિએ હુમલાખોરનો પીછો કર્યો અને તેને શાળાની અંદર ગોળી મારી. જોકે, હુમલાખોરને કોણે ગોળી મારી હતી તે અંગે પોલીસે પ્રાથમિક માહિતીમાં સ્પષ્ટતા કરી નથી. પોલીસ વિભાગના પ્રવક્તા શીલા મિલરે આશંકા વ્યક્ત કરી હતી કે હુમલાખોરને કોઈ રાહદારી અથવા સ્થળ પર હાજર કોઈ વ્યક્તિએ ગોળી મારી હશે.
કાર પર ફાયરિંગ થયાની માહિતી મળતાં જ સ્કૂલમાં અફરાતફરી મચી ગઈ હતી
પોલીસને રાત્રે 12:59 વાગ્યે 911 પર કોલ આવ્યો. ફોન કરનારે જણાવ્યું હતું કે શાળાની બહાર પાર્ક કરેલી કાર પર અજાણ્યા વ્યક્તિએ ગોળીબાર કર્યો હતો. થોડીવાર પછી, ઇમરજન્સી સેવાઓ પર ફરીથી કૉલ આવ્યો. કહેવામાં આવ્યું હતું કે એક વ્યક્તિ સ્કૂલમાં ઘૂસી ગયો છે અને ફાયરિંગ કરી રહ્યો છે.
માહિતી મળતા જ પોલીસ ઘટનાસ્થળે પહોંચી ગઈ હતી અને સ્કૂલમાં હાજર લોકોને બહાર કાઢવાની પ્રક્રિયા શરૂ કરી હતી. પોલીસકર્મીઓ એક પછી એક શાળાના રૂમની તપાસ કરી રહ્યા હતા અને લોકોને સલામત રીતે બહાર કાઢી રહ્યા હતા.
