ગાંધીનગર: રાજ્ય (ગુજરાત)ના અનેક જિલ્લાઓમાં આજે સવારથી કમોસમી વરસાદ થયો છે. દરમિયાન ઉત્તર ગુજરાતના કચ્છ, ખંભાળિયા, રાજકોટ, વલસાડ સહિતના અનેક વિસ્તારોમાં કમોસમી વરસાદે ખેડૂતોની ચિંતામાં વધારો કર્યો છે. ખાસ કરીને દ્વારકા જિલ્લામાં સૌથી વધુ કમોસમી વરસાદ પડી રહ્યો છે. આ સાથે ખંભાળિયા અને દ્વારકા પંથકના ગ્રામ્ય વિસ્તારોમાં ગાજવીજ સાથે કમોસમી વરસાદ થયો હતો.
હવામાન વિભાગની આગાહી બાદ 2 માર્ચની સવારથી રાજ્યના અનેક વિસ્તારોમાં હવામાનમાં પલટો જોવા મળ્યો હતો. બપોરના 12 વાગ્યાના સુમારે અચાનક ઠંડા પવન સાથે વરસાદ શરૂ થયો હતો. તેમજ રસ્તાઓ પર પાણી ફરી વળ્યા હતા. જેના કારણે વાહન ચાલકોને ભારે હાલાકીનો સામનો કરવો પડ્યો હતો.
આ સાથે વરસાદી ઝાપટાંના કારણે પાકને નુકસાન થવાની સંભાવના પણ વધી છે. જેના કારણે ખેડૂતોમાં ચિંતા જોવા મળી રહી છે. તમને જણાવી દઈએ કે અફઘાનિસ્તાન અને આસપાસના વિસ્તારોમાં સાયક્લોનિક સરક્યુલેશનની રચનાને કારણે ગુજરાતમાં ભારે વરસાદ થઈ રહ્યો છે. હવામાન વિભાગે છેલ્લા 48 કલાક દરમિયાન ગુજરાતના વિવિધ ભાગોમાં મધ્યમ વરસાદ અને ગાજવીજ સાથે વરસાદની આગાહી કરી હતી.
આ સાથે બનાસકાંઠામાં પણ નોંધપાત્ર વરસાદ નોંધાયો છે. જેમાં ખાસ કરીને ધાનેરા, ડીસા, પાલનપુર, ભીલડી, દિયાદર, ભાભર, કાંકરેજ, થરાદ, સુઇગામ સહિતના વિસ્તારોમાં વરસાદ થયો છે. આ સાથે કમોસમી વરસાદની આગાહીના પગલે મહેસાણાના હવામાનમાં પલટો આવ્યો છે. ઊંઝામાં સવારથી વરસી રહેલા વરસાદના કારણે પાકને નુકશાન થવાની સંભાવના વધી છે.
વરસાદની આગાહી વચ્ચે જામનગરના ગ્રામ્ય વિસ્તારોમાં વરસાદી માહોલ છવાયો છે. સવારથી ઘનઘોર વાદળો વચ્ચે ભારે વરસાદના કારણે પાકને નુકસાન થતા ખેડૂતો ચિંતિત છે. આજે સવારથી ધ્રોલ, કાલાવડ, જોડીયા તાલુકામાં વરસાદ પડી રહ્યો છે. આ સાથે પોરબંદર, અરવલી, સૌરાષ્ટ્રમાં પણ વાદળો વરસ્યા હતા.
ઉત્તર ગુજરાતના જિલ્લાઓમાં સવારથી જ વરસાદી માહોલ જોવા મળી રહ્યો છે. જેમાં પાટણના સાંતલપુર, રાધનપુર તાલુકાના વાતાવરણમાં પલટો આવ્યો છે. સવારથી જ આકાશમાં વરસાદી વાદળો છવાયા હતા. આ ઉપરાંત કેટલાક વિસ્તારોમાં છુટાછવાયા વરસાદી ઝાપટા પડ્યા હતા. જેમાં વારાહી, સાદપુરા, પીપળી, ગોતરકા, નવાગામ, અબિયાણા સહિતના ગામોમાં વરસાદ થયો છે. વરસાદને કારણે ખેતરોમાં ઉગાડેલા જીરૂ, ઇસબગુલ, અજમો, સુવાદાણા વગેરે પાકોને નુકસાન થવાની સંભાવના છે.