ડીસા નગરપાલિકા દ્વારા જૂનાડીસા પાસે જંગી કચરાના નિકાલને લઈને ફરી એકવાર વિવાદ શરૂ થયો છે. જૂનાડીસા પાસે જમીન ફાળવવા ડેપ્યુટી કલેકટર દ્વારા કરાયેલી કાર્યવાહી સામે ગ્રામજનોએ વિરોધ નોંધાવ્યો છે. ડીસા નગરપાલિકા 2003થી જૂનાડીસા પાસે ડમ્પીંગ સાઈટ બનાવી ઘન કચરાનો નિકાલ કરી રહી છે. ડીસા શહેરનો તમામ કચરો અહીં લાવીને ડમ્પ કરવામાં આવે છે, પરંતુ ઘન કચરાના ડમ્પિંગને કારણે ચારેબાજુ રોગચાળો ફેલાઈ રહ્યો છે, આથી જૂનાડીસાના લોકોએ આ બાબતે ગુજરાત હાઈકોર્ટ અને દિલ્હીની નેશનલ ગ્રીન ટ્રિબ્યુનલમાં ફરિયાદ કરી હતી. જેમાં નેશનલ ગ્રીન ટ્રિબ્યુનલે જાન્યુઆરી 2024માં માત્ર 2 મહિનામાં આ ઘન કચરા સ્થળને ખાલી કરીને આ ઘન કચરા સ્થળને અન્ય જગ્યાએ શિફ્ટ કરવાનો આદેશ આપ્યો છે.
જેને લઇ ડીસા ડેપ્યુટી કલેકટરે હવે કચરાના નિકાલ માટે નવી જગ્યાની શોધ શરૂ કરી છે. આ ઉપરાંત ડીસા નગર અને ડીસા તાલુકામાં અનેક સરકારી પડતર જમીનો હોવા છતાં નાયબ કલેકટર દ્વારા જુનાડીસા ગામની જ જમીન ફાળવવાનો પ્રયાસ કરાયો છે. જેના વિરોધમાં આજે જુનાડીસામાં ગામના આગેવાનો, યુવાનો અને વડીલોની બેઠક મળી હતી. જેમાં તમામ લોકોએ ભેગા મળીને જૂનાડીસા ગામના એકપણ સર્વે નંબરમાં ઘન કચરાની ડમ્પીંગ સાઈટ માટે કોઈપણ પ્રકારની જમીન ન ફાળવવા મુદ્દે ચર્ચા કરી હતી અને તમામ લોકોએ એકસાથે આ બાબતે વિરોધ વ્યક્ત કર્યો હતો.આ અંગે ગામના માજી સરપંચ બાબાભાઈ એ. દેસાઈ અને આગેવાન પસાભાઈ પ્રજાપતિએ જણાવ્યું હતું કે, ડીસા નગરપાલિકા વિસ્તારમાં સરકારી જમીન વધુ પડતી પડી છે ત્યારે અમારા ગામ જુનાડીસામાં જમીન ફાળવવા ડેપ્યુટી કલેકટરે દરખાસ્ત કરી છે ત્યારે આજે અમે જુનાડીસા ગામના તમામ આગેવાનો અને લોકો ભેગા મળી વિરોધ દર્શાવ્યો છે. આ બાબત અને જુનાડીસામાં ઘન કચરાના ડમ્પીંગ સાઈટ માટે કોઈપણ ભોગે જમીન ફાળવવા દઈશું નહીં.