પુણે: ટામેટાંની વધતી કિંમતોએ સામાન્ય માણસના ખિસ્સા પર મોટો ફટકો માર્યો છે, ત્યારે મહારાષ્ટ્રના પુણેના એક ખેડૂત માટે આ નફાકારક સોદો સાબિત થયો છે. તમામ પડકારોને પાર કરીને પૂણેના આ ખેડૂતે છેલ્લા એક મહિનામાં ટામેટાંનો પાક વેચીને 3 કરોડ રૂપિયાની કમાણી કરી છે. પુણે જિલ્લાના જુન્નર તહસીલના પચઘર ગામના ખેડૂત ઈશ્વર ગાયકર (36)ને ઓછા ભાવને કારણે આ વર્ષે મે મહિનામાં ટમેટાના પાકનો મોટો જથ્થો ફેંકી દેવો પડ્યો હતો.
આટલા આંચકા છતાં, આ ખેડૂતે અતૂટ નિશ્ચય બતાવ્યો અને તેના 12 એકરના ખેતરમાં ટામેટાંની ખેતી કરી. હવે ટામેટાંના આસમાની કિંમતો વચ્ચે, ગાયકરની મહેનતનું સુંદર ફળ મળ્યું છે અને તે કરોડપતિ બની ગયો છે. ગાયકરે દાવો કર્યો છે કે તેણે 11 જૂનથી 18 જુલાઈ વચ્ચે ટામેટાંની પેદાશ વેચીને 3 કરોડ રૂપિયાની કમાણી કરી છે. “આ સમયગાળા દરમિયાન, તેમણે જુન્નર તહસીલના નારાયણગાંવ ખાતે કૃષિ ઉત્પાદન બજાર સમિતિ (APMC)માં 18,000 ક્રેટ (પ્રત્યેક 20 કિલો ટામેટાં) ટામેટાં ત્રણ કરોડમાં વેચ્યા છે,” ગાયકરે પીટીઆઈને જણાવ્યું હતું.
ટામેટાંના બાકીના 4,000 ક્રેટનું વેચાણ કરીને તે લગભગ રૂ. 50 લાખ કમાવવાનો ઇરાદો ધરાવે છે. ગાયકરે જણાવ્યું કે તેણે ટામેટાની ખેતી અને ટ્રાન્સપોર્ટેશન પાછળ કુલ 40 લાખ રૂપિયાનો ખર્ચ કર્યો છે. તેણે કહ્યું, મારી પાસે 18 એકર જમીન છે. તેમાંથી મેં 12 એકરમાં ટામેટાની ખેતી કરી હતી. 11 જૂનથી મેં ટામેટાંના 18,000 ક્રેટ વેચીને 3 કરોડ રૂપિયાની કમાણી કરી છે. ગાયકરે 11 જૂને 770 રૂપિયા પ્રતિ ક્રેટ (37 થી 38 રૂપિયા પ્રતિ કિલો)ના ભાવે ટામેટાંનું વેચાણ કર્યું હતું. 18 જુલાઈના રોજ, તેને ક્રેટ દીઠ રૂ. 2,200 (કિલો દીઠ રૂ. 110) મળ્યા.
ગાયકરે યાદ કર્યું કે કેવી રીતે બે મહિના પહેલા તેણે નીચા ભાવને કારણે લણેલા ટમેટાના પાકને ફેંકી દેવો પડ્યો હતો. ટામેટા ઉત્પાદકો માટે આ શ્રેષ્ઠ સમય છે, પરંતુ અમે સૌથી ખરાબ સમય પણ જોયો છે, એમ તેમણે જણાવ્યું હતું. મે મહિનામાં મેં એક એકર જમીનમાં ટામેટાં ઉગાડ્યા હતા, પરંતુ ખૂબ ઓછા ભાવને કારણે મોટી માત્રામાં ઉત્પાદન ફેંકવું પડ્યું હતું. મેં ઉત્પાદન ફેંકી દીધું હતું કારણ કે ક્રેટ દીઠ દર માત્ર રૂ. 50, એટલે કે રૂ. 2.50 પ્રતિ કિલો હતો.
ગાયકરે જણાવ્યું કે 2021માં તેમને 15 લાખથી 16 લાખ રૂપિયાનું નુકસાન થયું હતું અને ગયા વર્ષે પણ તેમને નજીવો નફો થયો હતો. અન્ય ખેડૂત રાજુ મહાલેએ પણ ચાલુ સિઝનમાં 2.5 હજાર ક્રેટ ટામેટાં વેચીને 20 લાખ રૂપિયાની કમાણી કરી છે. નારાયણગાંવ એગ્રીકલ્ચર પ્રોડ્યુસ માર્કેટ કમિટીના વેપારી અક્ષય સોલાટે ગાયકરની ઉપજ ખરીદી છે. સોલાટે જણાવ્યું હતું કે હાલમાં ટામેટાંનું બજાર ધમધમી રહ્યું છે. તેણે ક્રેટ દીઠ રૂ. 2,400ના ભાવે ટામેટાં ખરીદ્યા. તેણે કહ્યું, “હું છેલ્લા 15 વર્ષથી આ વ્યવસાયમાં છું. પરંતુ ટામેટાંમાં આ પ્રકારની તેજી અગાઉ ક્યારેય જોવા મળી નથી.