ડીસામાં આજે બે અલગ-અલગ અકસ્માતમાં બે યુવકોના મોત થયા હતા. આજે બનાસપુલ પાસે ડમ્પર ચાલકે બાઇકને ટક્કર મારતાં અકસ્માત સર્જાયો હતો. ભોપાનગર નજીક બે બાઇક સામસામે અથડાવાને કારણે આ અકસ્માત સર્જાયો હતો. બંને અકસ્માતમાં બે બાઇક સવારોના મોત થયા છે. ડીસાના ભોપાનગર વિસ્તારમાં રહેતા મહેન્દ્ર વણકર નામના યુવકના એક મહિના બાદ લગ્ન થવાના હતા. દરમિયાન આજે આ યુવક તેના સાળાને બાઇક પર હોચુલ ચાર રસ્તા પાસે મુકવા ગયો હતો અને તેની વહુને મુકીને પરત ફરી રહ્યો હતો. ત્યારે બનાસકુલ પાસે ડમ્પર ચાલકે યુવાન બાઇક સવારને ટક્કર મારતાં અકસ્માત સર્જાયો હતો. આ અકસ્માતમાં બાઇક સવાર યુવાનનું ડમ્પરના ટાયર નીચે કચડાઇ જતાં ઘટનાસ્થળે જ મોત નીપજ્યું હતું. અકસ્માતને પગલે હાઈવે પર જામ થઈ ગયો હતો. અકસ્માતની જાણ થતાં જ ડીસા તાલુકા પોલીસ તાત્કાલિક ઘટના સ્થળે પહોંચી લાશને પોસ્ટમોર્ટમ માટે ડીસાની સરકારી હોસ્પિટલમાં ખસેડી અકસ્માત સર્જનાર ડમ્પરને પોલીસ મથકે લાવી વાહન વ્યવહાર ખુલ્લો કરાવ્યો હતો.
તમને જણાવી દઈએ કે મૃતક યુવક મહેન્દ્ર વણકરના એક મહિના પછી લગ્ન થવાના હતા અને પરિવાર પણ લગ્નની તૈયારીઓમાં વ્યસ્ત હતો. ત્યારે એક આશાસ્પદ યુવકનું લગ્ન પહેલા જ મોત થતા પરિવારમાં શોકનો માહોલ છવાયો છે. આ ઉપરાંત ડીસા પાટણ હાઇવે પર ભોપાનગર ફાટક પાસે બે બાઇક સામસામે અથડાતા કરૂણ અકસ્માત સર્જાયો હતો. આ અકસ્માતમાં બાઇક સવાર સચિન ઠાકોરનું ઘટના સ્થળે જ કરૂણ મોત નિપજ્યું હતું. જ્યારે અન્ય બાઇક ચાલક મુકેશ ઠાકોરને ગંભીર ઇજા પહોંચી હતી. ઘટના બાદ 108 એમ્બ્યુલન્સ વાન તાત્કાલિક ઘટનાસ્થળે પહોંચી હતી અને ઈજાગ્રસ્ત યુવકને સારવાર માટે લઈ જવામાં આવ્યો હતો. જ્યારે ડીસા તાલુકા પોલીસે લાશને પોસ્ટમોર્ટમ માટે મોકલી આગળની કાર્યવાહી હાથ ધરી છે.