સૌરાષ્ટ્રનો સૌથી મોટો લોકમેળો રંગીલા રાજકોટ 5 થી 9 સપ્ટેમ્બર સુધી પાંચ દિવસ ચાલનાર છે. આ મેળામાં લોકમેળા અમલીકરણ સમિતિ દ્વારા વ્યવસાયિક કામગીરી માટે 355 સ્ટોલ અને પ્લોટ ફાળવવામાં આવ્યા છે. આ સાથે જ પ્રથમ વખત લોકમેળામાં ફરજ પરના કર્મચારીઓને સંદેશાવ્યવહાર માટે વોકી-ટોકી ફાળવવાનો નિર્ણય લેવાયો છે.
હાલમાં રેસકોર્સ મેદાનમાં લોકમેળાની તડામાર તૈયારીઓ ચાલી રહી છે. આ વર્ષે લોકમેળામાં રમકડાંના 178 સ્ટોલ, 14 ખાણીપીણીના સ્ટોલ, મધ્યમ ચકરડીના 4 પ્લોટ, નાની ચકરડીના 48 પ્લોટ ડ્રો પધ્ધતિથી ફાળવવામાં આવ્યા છે. જ્યારે 37 ફૂડ સ્ટોલ, 44 મિકેનિકલ પ્લોટ, 16 આઈસ્ક્રીમ પ્લોટ, 3 ફૂટ કોર્ટ પ્લોટ, 1 ટી કોર્નર પ્લોટ હરાજી દ્વારા ફાળવવામાં આવ્યો છે. લોકમેળામાં લોકોના મનોરંજન માટે વિવિધ સાંસ્કૃતિક કાર્યક્રમો માટે આકર્ષક ડોમની પણ વ્યવસ્થા કરવામાં આવશે.
આ વખતે લોકમેળામાં 3 DCP, 10 ACP, 28 PI, 81 PSI, 1067 પોલીસ, 77 SRP સહિત કુલ 1266 પોલીસ જવાનો તૈનાત રહેશે. આ ઉપરાંત 100 ખાનગી સુરક્ષા ગાર્ડ ફરજ પર રહેશે. જનતાની સલામતી માટે 18 વોચ ટાવર પર સીસીટીવી કેમેરાથી નજર રાખવામાં આવશે. આ ઉપરાંત લોકોની સુરક્ષા માટે રસરંગ લોકમેળા માટે રૂ.4 કરોડનો વીમો પણ કરાયો છે.