પાકિસ્તાનની અંદર સુરક્ષા વ્યવસ્થા સંપૂર્ણપણે પડી ભાંગી છે. વર્ષ 2026 દેશના સુરક્ષા દળો માટે છેલ્લા અઢી દાયકામાં સૌથી ઘાતક અને ભયાનક વર્ષ સાબિત થઈ રહ્યું છે. સાઉથ એશિયન ટેરરિઝમ પોર્ટલ (SATP) ના તાજેતરના ડેટા અનુસાર, 1 જાન્યુઆરીથી 15 સપ્ટેમ્બર, 2026 વચ્ચે, હિંસક ઘટનાઓ અને આત્મઘાતી હુમલાઓમાં 1,000 થી વધુ સુરક્ષા કર્મચારીઓએ જીવ ગુમાવ્યો છે.
આ આંકડો માત્ર આર્મી પૂરતો મર્યાદિત નથી, પરંતુ તેમાં ફ્રન્ટિયર કોર્પ્સ (એફસી), પોલીસ અને લેવીઝના જવાનોનો પણ સમાવેશ થાય છે. આ જ સમયગાળા દરમિયાન 650 થી વધુ નાગરિકોએ પણ જીવ ગુમાવ્યા છે. 2009 પછી આ ત્રીજી વખત છે જ્યારે પાકિસ્તાની સેના અને પોલીસને આટલી મોટી સંખ્યામાં તેમના સૈનિકોના મૃતદેહો ઉપાડવા પડ્યા છે.
KPK અને બલૂચિસ્તાન ‘ડેથ ઝોન’ બન્યા
પાકિસ્તાન સરકાર માટે સૌથી મોટો માથાનો દુખાવો બે પશ્ચિમી પ્રાંત છે – ખૈબર પખ્તુનખ્વા (KPK) અને બલૂચિસ્તાન. આ બંને વિસ્તારોમાં વિદ્રોહી જૂથોએ આર્મી કેમ્પ, પોલીસ સ્ટેશન, કાફલા અને સરકારી ઈમારતો પર ઝડપી હુમલા શરૂ કર્યા છે.
માત્ર ઓગસ્ટ મહિનામાં જ દેશભરમાં 190 જેટલા આતંકી હુમલા નોંધાયા હતા. સપ્ટેમ્બરના પ્રથમ પાંચ દિવસમાં 15થી વધુ મોટી ઘટનાઓ બની હતી.
