અમદાવાદઃ પશ્ચિમ એશિયામાં વધી રહેલા તણાવના કારણે આગલા દિવસના ઉછાળા બાદ તા. ભારતીય શેરબજારમાં ફરી મોટો ઘટાડો જોવા મળ્યો અને સ્થાનિક બજારના મુખ્ય બેન્ચમાર્ક લાલ નિશાનમાં બંધ થયા. દરમિયાન, દેશમાં કુદરતી ગેસના પુરવઠાને લઈને વધતી કટોકટી છતાં, અદાણી ટોટલ ગેસના શેર લગભગ 20 ટકા ઉછળીને અપર સર્કિટ પર પહોંચ્યા હતા. આ સમયગાળા દરમિયાન, NSE પર કંપનીના શેર રૂ. 566.90 પર બંધ થયા હતા.
કંપનીના શેરમાં આ તીવ્ર વધારો એ જાહેરાત પછી જોવા મળ્યો હતો, જેમાં કહેવામાં આવ્યું હતું કે સરકારના તાજેતરના આદેશ હેઠળ, ઘરેલું પાઇપ્ડ નેચરલ ગેસ (PNG) અને વાહનોમાં વપરાતા કોમ્પ્રેસ્ડ નેચરલ ગેસ (CNG)ને ગેસ સપ્લાયમાં પ્રાથમિકતા આપવામાં આવી છે.
આ સમયગાળા દરમિયાન કંપનીના શેરમાં ભારે ટ્રેડિંગ પણ જોવા મળ્યું હતું. નેશનલ સ્ટોક એક્સચેન્જ (NSE) અને BSE પર કુલ 1.64 કરોડથી વધુ શેરનો વેપાર થયો હતો, જે સામાન્ય કરતાં લગભગ 20 ગણો વધુ હતો.
અદાણી ટોટલ ગેસ સિટી ગેસ ડિસ્ટ્રિબ્યુશન બિઝનેસમાં કાર્યરત છે અને સ્થાનિક, વ્યાપારી, ઔદ્યોગિક અને વાહન વપરાશકારોને કુદરતી ગેસનો સપ્લાય કરે છે. બજારમાં ઘટાડા છતાં અન્ય ગેસ કંપનીઓના શેરમાં પણ ઇન્ટ્રા-ડે ટ્રેડિંગ દરમિયાન વધારો જોવા મળ્યો હતો. ગુજરાત ગેસનો શેર લગભગ 12 ટકા વધીને રૂ. 420 થયો હતો અને ટ્રેડના અંતે રૂ. 3.96 ટકા વધીને રૂ. 390 પર બંધ થયો હતો.
આ સિવાય પેટ્રોનેટ એલએનજી, ગેઈલ (ઈન્ડિયા), ઈન્દ્રપ્રસ્થ ગેસ (આઈજીએલ) અને મહાનગર ગેસ (એમજીએલ)ના શેરમાં પણ ખરીદી જોવા મળી હતી અને તે લગભગ 2 ટકા વધીને બંધ થયા હતા. તેના મુખ્ય વ્યવસાય ઉપરાંત, અદાણી ટોટલ ગેસ બાયોગેસ, બાયોફ્યુઅલ, બાયોમાસ, લિક્વિફાઇડ કોમ્પ્રેસ્ડ નેચરલ ગેસ, હાઇડ્રોજન-સમૃદ્ધ CNG, ઇલેક્ટ્રિક વાહનો અને હાઇડ્રોજન સંબંધિત વ્યવસાયોમાં પણ તકો શોધી રહી છે.
કંપનીએ એક નિયમનકારી ફાઇલિંગમાં જણાવ્યું હતું કે તેના કેટલાક ગેસ સપ્લાયર્સે મધ્ય પૂર્વમાં વધતા ભૌગોલિક રાજકીય તણાવને કારણે સપ્લાયમાં ઘટાડો કર્યો છે. જેના કારણે કંપની માટે કેટલાક ઔદ્યોગિક ગ્રાહકોને ગેસ પૂરો પાડવાનું મુશ્કેલ બન્યું છે.
