પશ્ચિમ એશિયામાં ચાલી રહેલા યુદ્ધને કારણે સમગ્ર વિશ્વમાં ઉર્જા સંકટના વાદળો ઘેરાઈ રહ્યા છે. પરંતુ આ દરમિયાન પાકિસ્તાન નવા ટ્રેડ કોરિડોર બનાવવામાં વ્યસ્ત છે. અડધા વિશ્વ સાથે દુશ્મનાવટ ધરાવતા ઈરાનની સાથે પાકિસ્તાને પાક-ઈરાન ટ્રાન્ઝિટ કોરિડોર શરૂ કર્યો છે, જે તેને મધ્ય એશિયાના દેશો સાથેનો વેપાર વધારવામાં મદદ કરશે. પાકિસ્તાનના ગ્વાદરથી શરૂ થતો આ વેપાર માર્ગ આગામી વર્ષોમાં ઈસ્લામાબાદ માટે મજબૂત આર્થિક સ્તંભ સાબિત થઈ શકે છે. તાજેતરમાં આ કોરિડોરનું ઔપચારિક ઉદ્ઘાટન કરવામાં આવ્યું હતું.
એક્સપ્રેસ ટ્રિબ્યુનના અહેવાલ મુજબ, પાકિસ્તાની ટ્રાન્ઝિટ ટ્રેડ કસ્ટમ્સના ડાયરેક્ટર સનાઉલ્લાહે કહ્યું કે આ માર્ગ શરૂ કરવામાં આવ્યો છે. તાજેતરમાં, ફ્રોઝન માંસનો પ્રથમ માલ રેફ્રિજરેટેડ ટ્રક દ્વારા તાશ્કંદ, ઉઝબેકિસ્તાન મોકલવામાં આવ્યો છે. તેમણે કહ્યું કે નવી વ્યવસ્થા હેઠળ પાકિસ્તાનથી સામાન ગ્વાદર થઈને ઈરાનમાં પ્રવેશશે અને પછી મધ્ય એશિયાઈ દેશો તરફ જશે. અબ્રોએ કહ્યું કે ઈરાન દ્વારા આ કોરિડોર ખોલવાથી પાકિસ્તાનના આર્થિક વિકાસને વેગ મળવાની અપેક્ષા છે. આ ઉપરાંત બંદરો દ્વારા માલની હેરફેરમાં પણ વધારો થવાની ધારણા છે.
પાકિસ્તાની અધિકારીઓના જણાવ્યા અનુસાર, અહીંનો કોરિડોર, ઈરાન દ્વારા શરૂ કરવામાં આવ્યો છે, જે TIR (ટ્રાન્સપોર્ટ્સ ઇન્ટરનેશનલ રાઉટિયર્સ) સિસ્ટમ હેઠળ કાર્યરત છે. આને વધુ સરળ બનાવવા માટે, સત્તાવાળાઓએ TIR પ્રક્રિયાઓને સરળ બનાવી છે અને તફ્તાન, રિમદાન, સોસ્ટ અને ગ્વાદર સહિતના મુખ્ય સરહદ બિંદુઓને સક્રિય કર્યા છે. અહેવાલો અનુસાર, આ માર્ગ પાકિસ્તાનને દરિયાઈ વેપાર માટે આર્થિક વિકલ્પ પૂરો પાડશે, જેનાથી પરિવહનનો સમય ઘટશે અને લોજિસ્ટિક્સ ખર્ચમાં નોંધપાત્ર ઘટાડો થશે.
તમને જણાવી દઈએ કે, ઈરાન અને પાકિસ્તાન આર્થિક સંબંધોને વ્યૂહાત્મક ભાગીદારીમાં બદલવાના ઉદ્દેશ્ય સાથે 2028 પહેલા દ્વિપક્ષીય વેપારને $10 બિલિયન સુધી વધારવાની યોજના ધરાવે છે. અમેરિકા સાથે શાંતિ વાટાઘાટોમાં મધ્યસ્થી બન્યા બાદ પાકિસ્તાન સતત ઈરાન સાથે પોતાના સંબંધોને મજબૂત કરવાની દિશામાં આગળ વધી રહ્યું છે. વધતા સંબંધો વચ્ચે ઈરાન અને પાકિસ્તાનમાં અટવાયેલી ઓઈલ પાઈપલાઈન પરિયોજના ફરી એકવાર શરૂ થવાની ધારણા છે.
ઉલ્લેખનીય છે કે ઈરાન અને પાકિસ્તાને 2009માં વેપાર કરાર કર્યા હતા.જે અંતર્ગત 2013માં ગેસ પાઈપલાઈનનું ઉદ્ઘાટન કરવામાં આવ્યું હતું.આ પાઈપલાઈનને ભારતમાં પણ લાવવાની યોજના હતી. પરંતુ પાકિસ્તાનની રાજકીય અસ્થિરતા અને આર્થિક નબળાઈના કારણે તેનું કામ પૂર્ણ થઈ શક્યું ન હતું. ઈરાને આ પાઈપલાઈનનું કામ પૂરું કર્યું પણ પાકિસ્તાન તેને શરૂ પણ કરી શક્યું નહીં.
