ડિઝાઇનર ડ્રગ્સની તસ્કરી બદલ રાજસ્થાનના શખ્સને ૧૫ વર્ષની સખત કેદ, ૨…

અમદાવાદ, ૨ મે: અમદાવાદની સ્પેશિયલ NDPS કોર્ટે ૧૮૫ ગ્રામ ‘4-મેથાઈલેથકેથિનોન’ (4-MEC) નામના સાયકોટ્રોપિક પદાર્થની આંતરરાજ્ય તસ્કરીના કેસમાં રાજસ્થાનના એક શખ્સને ૧૫ વર્ષની સખત કેદની સજા ફટકારી છે. એનસીબી (NCB) ના અધિકારીએ શનિવારે આ માહિતી આપી હતી. આ પદાર્થ સામાન્ય રીતે “ડિઝાઇનર ડ્રગ” તરીકે પણ ઓળખાય છે.

રૂ. ૨ લાખનો દંડ ફટકારાયો અમદાવાદની સિટી સિવિલ એન્ડ સેસન્સ કોર્ટે રાજસ્થાનના પ્રતાપગઢના રહેવાસી દશરથ સિંહને નાર્કોટિક ડ્રગ્સ એન્ડ સાયકોટ્રોપિક સબસ્ટન્સ (NDPS) એક્ટ, ૧૯૮૫ હેઠળ દોષિત જાહેર કર્યો છે. સજાની સાથે કોર્ટે તેના પર ૨ લાખ રૂપિયાનો દંડ પણ ફટકાર્યો છે.

Drug trafficker sentenced to 15 years rigorous imprisonment along with a fine of Rs 2 lakh in 2023 Ahmedabad designer drug trafficking case.

બોર્ડી મિલ કમ્પાઉન્ડ પાસેથી થઈ હતી ધરપકડ NCB અમદાવાદ ઝોનલ યુનિટના અધિકારીઓએ ચોક્કસ બાતમીના આધારે ૩૦ જાન્યુઆરી, ૨૦૨૩ના રોજ દશરથ સિંહની ધરપકડ કરી હતી. તે મંદસૌરથી અમદાવાદ આવતી બસ ચલાવી રહ્યો હતો, ત્યારે અમદાવાદના કાંકરિયા રોડ પર હીરાભાઈ માર્કેટ પાસે આવેલા બોર્ડી મિલ કમ્પાઉન્ડ પાર્કિંગમાંથી તેને ઝડપી લેવામાં આવ્યો હતો. તપાસ દરમિયાન તેની પાસેથી ૧૮૫ ગ્રામ 4-MEC જપ્ત કરવામાં આવ્યું હતું.

શું છે આ ‘ડિઝાઇનર ડ્રગ’ (4-MEC)? NCB ના જણાવ્યા અનુસાર, 4-MEC એ એક સિન્થેટીક ઉત્તેજક પદાર્થ છે જે નવા સાયકોએક્ટિવ પદાર્થોના વર્ગમાં આવે છે. તે સામાન્ય રીતે પાવડર અથવા સ્ફટિક સ્વરૂપે જોવા મળે છે. એમ્ફેટામાઈન જેવા ઉત્તેજક પ્રભાવને કારણે નશાખોરો તેનો ઉપયોગ કરે છે, પરંતુ તેનું સેવન અત્યંત જોખમી છે. તેનાથી ચિંતા, બેચેની, હૃદયના ધબકારા વધવા, હાઈ બ્લડ પ્રેશર અને નશાની આદત જેવા ગંભીર સ્વાસ્થ્ય જોખમો ઊભા થાય છે.

NCBની સફળતા NCB દ્વારા ૨૫ જુલાઈ, ૨૦૨૩ના રોજ આ મામલે ચાર્જશીટ દાખલ કરવામાં આવી હતી. NCB અમદાવાદ ઝોનલ યુનિટની ઝીણવટભરી તપાસ અને સચોટ કાર્યવાહીને કારણે આરોપીને સજા અપાવવામાં સફળતા મળી છે, જે સમાજને નશાના દુષણથી બચાવવા માટે મહત્વપૂર્ણ છે.