ગાંધીનગર, ગાંધીનગર જીઆઈડીસી નજીક મંગળવારે મોડી રાત્રે એલસીબીની ટીમે લકઝરી ક્રેટા કારમાંથી ર.૭૭ લાખના દારૂ-બિયરની ૧ર૦૦ બોટલ સાથે બે ખેપિયાને ઝડપી લીધા હતા. દારૂનો જથ્થો કોલવડાના બૂટલેગર નરેશ રાવળે મંગાવ્યો હોવાનો ઘટસ્ફોટ થયો છે.
ગાંધીનગર લોકલ ક્રાઈમ બ્રાંચના પી.આઈ દિવાનસિંહ વાળાની ટીમ પેટ્રોલિંગ કરી રહી હતી. તે દરમિયાન બાતમી મળી હતી કે હ્યુન્ડાઈ ક્રેટા કારમાં વિદેશી દારૂનો જથ્થો ભરીને કોલવડા તરફ લઈ જવામાં આવી રહ્યો છે. તેના આધારે પોલીસે સેકટર-ર૬ જીઆઈડીસી ગેટ પાસે વોચ ગોઠવી હતી.
ત્યારે રાત્રિના સમયે શંકાસ્પદ ક્રેટા કાર આવતા પોલીસે તેને ઉભી રાખવા ઈશારો કરવા છતાં ચાલકે પૂરઝડપે કાર ચલાવી જીઆઈડીસીની અંદર લઈ ગયો હતો.
પોલીસે ખાનગી વાહનોમાં પીછો કરતા જીઆઈડીસીના અંદરના રોડ પર એક સ્પીડ બ્રેકર પર ચાલકે સ્પીડ ઓછી ન કરતા કાર જોરદાર ધડાકા સાથે રોડ પર પછડાઈ હતી.
આ અકસ્માતને કારણે કારનું પાછળનું વ્હીલ ફાટી ગયું હતું અને ચાલકે કાબુ ગુમાવતા કાર ઓટો ગેસ એજન્સી સામે બંધ પડી ગઈ હતી. ત્યારે પોલીસે કોર્ડન કરી ઝડપી પાડેલા બે આરોપીની પૂછપરછ કરતાં તેમણે પોતાના નામ નકુલ રાજપુરોહિત (રહે. ડીસા) અને સુંદર બાગડીયા (રહે. સાંચોર) હોવાનું જણાવ્યું હતું.
પોલીસે કારની તલાશી લેતા અંદરથી ર.૭૭ લાખથી વધુની કિંમતનો દારૂ બિયરનો જથ્થો મળી આવ્યો હતો. બંને ખેપિયાની પૂછપરછ કરતા કોલવડા ગામના નરેશ રાવળે આ દારૂનો જથ્થો મંગાવ્યો હતો અને રાજસ્થાનમાં ભારતમાલા હાઈવે પર એક અજાણ્યા શખ્સે જથ્થો કારમાં ભરી આપ્યો હોવાનું સામે આવ્યું હતું.
