ગાંધીનગર આરટીઓમાં સતત બે દિવસ ઈન્ટરનેટ સેવા ખોરવાતા હાલાકી -ઓનલાઈન ટેસ્ટ અટકતા અરજદારો પરેશાન, બપોર બાદ કામગીરી થાળે પડી
ગાંધીનગર, ગાંધીનગર સ્થિત આરટીઓ કચેરીમાં છેલ્લા બે દિવસથી ઈન્ટરનેટ કનેક્ટિવિટીમાં સર્જાયેલી ગંભીર ટેકનિકલ ખામીને કારણે વહીવટી કામગીરી સંપૂર્ણપણે ઠપ થઈ ગઈ હતી.
સરકાર દ્વારા ડિજિટલ ઈન્ડિયા અને પેપરલેસ કામગીરીના મસમોટા દાવાઓ કરવામાં આવે છે, પરંતુ આ પ્રકારની ટેકનિકલ સમસ્યાઓને કારણે વાહનચાલકો અને અરજદારોને ભારે મુશ્કેલીનો સામનો કરવો પડ્યો હતો. ખાસ કરીને શોરૂમમાંથી નવા વાહનો ખરીદનારા માલિકો અને ડીલરો માટે રજીસ્ટ્રેશનની પ્રક્રિયા અટકી પડતા તેઓ મુશ્કેલીમાં મુકાયા હતા.
ઘટનાની વિગતો મુજબ બપોરના સમયથી જ આરટીઓ કચેરીમાં ઈન્ટરનેટ સેવાઓ અચાનક ખોરવાઈ ગઈ હતી. આ ખામીની સીધી અસર ડ્રાઈવિંગ લાયસન્સ માટે લેવામાં આવતા ઓનલાઈન ટેસ્ટ પર પડી હતી. આ સમસ્યા બપોર સુધી યથાવત રહેતા સ્થિતિ વધુ ગંભીર બની હતી.
સવારથી જ મોટી સંખ્યામાં અરજદારો પોતાના વાહનો લઈને લાયસન્સનો ટેસ્ટ આપવા માટે ઉત્સાહભેર આરટીઓ પહોંચ્યા હતા, પરંતુ નેટવર્ક ન હોવાને કારણે તેમને ટેસ્ટ આપ્યા વગર જ પરત ફરવાની ફરજ પડી હતી. ઈન્ટરનેટના અભાવે ઓનલાઈન સિસ્ટમ બંધ રહેતા ટેસ્ટિંગ ટ્રેક પર પણ સન્નાટો જોવા મળ્યો હતો. આરટીઓ કચેરીમાં વારંવાર સર્જાતી આવી ટેકનિકલ ખામીઓને કારણે અરજદારોમાં ભારે રોષ ફેલાયો હતો.
કાળઝાળ ગરમીમાં લાંબા અંતરથી આવેલા અનેક લોકોએ આક્રોશ વ્યકત કરતા જણાવ્યું હતું કે, પૂર્વ સૂચના વગર કામગીરી બંધ રાખવામાં આવતા તેમનો સમય અને શક્તિ બંને વેડફાયા છે.
જોકે, તંત્ર દ્વારા સતત પ્રયાસો કર્યા બાદ બપોર પછી ઈન્ટરનેટ સેવાઓ પુનઃ સ્થાપિત કરવામાં આવી હતી. સેવા શરૂ થતાની સાથે જ કચેરીમાં હાજર અરજદારોના ટેસ્ટ લેવાની પ્રક્રિયા હાથ ધરવામાં આવી હતી અને જે લોકો આજે ટેસ્ટ આપી શક્યા નથી, તેમના સ્લોટ ફરીથી રી-શિડ્યુલ કરવાની તજવીજ હાથ ધરાઈ છે.
